Ronaldo ashobora guhanishwa igihano cy’amezi 6 atagaragara mu ikipe y’igihugu ya Portugal

Ronaldo w’imyaka 41, yavuye mu mwiherero wa Portugal nyuma yo kutitabazwa mu mukino ikipe ye yakinnye na Norway, nubwo yari yicaye ku ntebe y’abasimbura. Ibi byabaye mu gihe hari amakimbirane hagati ye n’umutoza mushya wa Portugal, Jorge Jesus, wahoze amutoza muri Al-Nassr.

Jorge Jesus yemeye ko yabwiye Ronaldo ko azakina uwo mukino, ariko nyuma aza guhindura umwanzuro, asiga uyu rutahizamu ku ntebe y’abasimbura adakinnye.

Byari bibaye ubwa mbere mu myaka 18 Ronaldo ari mu ikipe y’igihugu ariko amaze iminota yose y’umukino adakinnye. Nyuma yaho, kuva kwe mu mwiherero byatumye amakimbirane yari hagati ye n’umutoza ajya ahagaragara.

Mushiki wa Ronaldo, Elma Aveiro, na we yagaragaje ko musaza we akwiye kubahwa, asaba ko yahabwa “icyubahiro kirenzeho”.

Amategeko ya Portugal ashobora kumuhana

Nk’uko ESPN Brazil yabitangaje, amategeko y’Ishyirahamwe ry’Umupira w’Amaguru muri Portugal ateganya ibihano ku mukinnyi uva mu mwiherero w’ikipe y’igihugu cyangwa akanga kwitabira imyitozo, umukino cyangwa ikindi gikorwa cy’ikipe y’igihugu nta mpamvu yumvikana.

Iryo tegeko rivuga ko umukinnyi ushobora guhanishwa guhagarikwa gukina hagati y’ukwezi kumwe n’amezi atandatu, ndetse ku mukinnyi wabigize umwuga akaba ashobora no gucibwa amande ari hagati ya 500 na 1,000 by’ama-Euro.

Ibi bivuze ko Ronaldo ashobora guhura n’igihano gikomeye, mu gihe Ishyirahamwe ry’Umupira w’Amaguru muri Portugal ryafata umwanzuro ko kuva kwe mu mwiherero nta mpamvu yumvikana yari afite.

Ronaldo ubwe yavuze ko azatangaza ukuri ku byabaye “igihe nikigera”, ariko ko atashakaga kurangaza bagenzi be bari biteguye umukino wa Portugal na Denmark uza kuba uyu munsi.

Ronaldo yari amaze gukina na Wales

Mbere yo kuva mu mwiherero, Ronaldo yari yakinnye umukino Portugal yatsinzemo Wales, ariko ntiyitwara neza cyane kuko yabonye uburyo bukomeye bwo gutsinda ibitego akabupfusha ubusa.

Uyu mukinnyi umaze igihe kinini ari umwe mu bakinnyi bakomeye Portugal ifite, yanavuze ko yari yaratekereje ku guhagarika gukina umupira w’amaguru nyuma yo gutenguhwa n’imikorere ye mu gikombe cy’Isi.

Ubu Ronaldo ategereje kumenya niba azafatirwa ibihano nyuma yo kuva mu mwiherero, mu gihe amakimbirane hagati ye na Jorge Jesus akomeje kuvugisha benshi.