Ibiganiro byibanze ku ruhare rw’itangazamakuru mu guteza imbere umuco nyarwanda no kunoza imikoreshereze iboneye y’ururimi rw’ikinyarwanda, cyane cyane muri iki gihe isi iri mu ihindagurika rikomeye rishingiye ku ikoranabuhanga no ku ruhurirane rw’imico.
Muri ibi biganiro byabaye ku wa Mbere tariki ya 02 Werurwe 2026, RMC yagaragaje ko itangazamakuru rifite uruhare rukomeye mu gusigasira indangagaciro z’igihugu, guteza imbere ibikorwa by’umuco n’ubuhanzi, kwimakaza ikinyarwanda kinoze mu biganiro, inkuru n’imyidagaduro.
Abagize Komisiyo bagaragaje impungenge ku ikoreshwa ry’ururimi mu myidagaduro no ku mbuga nkoranyambaga, kuvanga indimi, ndetse n’icyuho kiri hagati y’abakuze n’abato mu gusigasira umuco nyarwanda.
Impande zombi zashimangiye ko hakenewe ubufatanye buhoraho hagati y’inzego za Leta, ibitangazamakuru, umuryango n’abandi bafatanyabikorwa kugira ngo itangazamakuru rikomeze kugira uruhare rufatika mu kubungabunga no guteza imbere umurage ndangamuco w’u Rwanda.
Nk'uko RMC yabitangaje ku rukuta rwayo rwa X, yashimangiye ko izakomeza kugenzura no kunoza iyubahirizwa ry’amahame y’umwuga w’itangazamakuru no gushyigikira ibikorwa byimakaza umuco n’ururimi rw’Ikinyarwanda.
RMC yitabiriye ibi biganiro iri kumwe n'Abayobozi b'Urwego rw'Igihugu rw'Itangazamakuru [RBA].
Ibi biganiro byibanze ku ruhare rw’itangazamakuru mu guteza imbere umuco nyarwanda no kunoza imikoreshereze iboneye y’ururimi rw’Ikinyarwanda