Richard Nick Ngendahayo na Adrien Misigaro bageze muri Australia mu myiteguro y’ibitaramo bazahakorera

Ni urugendo rufite umwihariko wo guhuza abahanzi bafite amazina akomeye muri Gospel nyarwanda, bakazageza ku Banyarwanda, Abarundi n’abandi Banyafurika batuye muri Australia ubutumwa bw’ihumure, kwizera no kuramya Imana binyuze mu muziki.

Richard Nick Ngendahayo na Adrien Misigaro bageze muri Australia mu ijoro ryo ku wa Mbere tariki 7 Nzeri 2026.

Ku kibuga cy’indege bakiriwe na Nadine Shema, uri mu bateguye ibi bitaramo, ndetse n’umuhanzi David Nduwimana bazafatanya ku rubyiniro.

Ibi bitaramo bizabera mu mijyi itatu ya Australia. Icya mbere kizabera i Brisbane ku wa Gatandatu tariki 12 Nzeri 2026, Melbourne yakire icya kabiri ku wa Gatandatu tariki 19 Nzeri, mu gihe icya nyuma kizabera i Sydney ku wa Gatandatu tariki 26 Nzeri 2026.

Ibi bitaramo byateguwe mu buryo butandukanye n’igitaramo gisanzwe cy’umuhanzi umwe. Ni urubuga ruzahuza abahanzi bafite amateka n’ubutumwa butandukanye, ariko bahuriye ku ntego imwe yo gukoresha umuziki mu kuramya Imana no guhuza abantu.

Ku Banyafurika baba muri Australia, by’umwihariko Abanyarwanda n’Abarundi, ni amahirwe yo kongera guhura, gusangira ukwizera no kwishimira umuziki bafiteho amateka, nubwo baba kure y’ibihugu bakomokamo.

Ni muri urwo rwego abategura ibi bitaramo babishyize mu mushinga mugari witwa ‘African Gospel Echoes’, ugamije kubaka umubano hagati ya Afurika na Australia binyuze mu muziki wa Gospel.

Mu bahanzi bazagaragara muri uru rugendo harimo Richard Nick Ngendahayo, umwe mu baramyi bamaze igihe kinini bafite umwanya ukomeye muri Gospel nyarwanda.

Yatangiye urugendo rwe rwa muzika mu ntangiriro z’imyaka ya 2000, kuva icyo gihe agenda yubaka izina binyuze mu ndirimbo zagiye zifasha benshi gukomeza kwizera no kwegera Imana.

Mu myaka amaze mu muziki, Richard Nick Ngendahayo yasohoye indirimbo zagiye zimenyekana cyane nka ‘Yambaye Icyubahiro’ ndetse n’indirimbo nka ‘Mbwira Ibyo Ushaka’, ‘Ibuka’, ‘Gusimba Umwonga’, ‘Si Umuhemu’, ‘Ijwi Rinyongorera’, ‘Sinzakwitesha’, ‘Wemere Ngushime’ na ‘Intwari Batinya’.

Mu 2026, izina rye ryongeye kugarukwaho cyane ubwo umuhanzi Gisa Cy’Inganzo yasubiragamo indirimbo ‘Intwari Batinya’, bikaba byaragaragajwe nk’ikimenyetso cy’icyubahiro n’umusanzu Richard amaze gutanga muri Gospel nyarwanda.

Muri uru rugendo, Richard yavuze ko yiteguye guhura n’abakunzi be muri Australia. Ati: “Ni ibitaramo bidasanzwe ngiye gukorera muri Australia.” Yasabye abazitabira kuzifatanya na we mu mwanya wo kuramya no guhimbaza Imana.

Adrien Misigaro na we ni umwe mu bahanzi b’Abanyarwanda bamaze kumenyekana cyane mu muziki wo kuramya no guhimbaza Imana, by’umwihariko ku Banyafurika baba mu mahanga.

Ubusanzwe atuye muri Leta Zunze Ubumwe za Amerika, mu Mujyi wa Washington, aho amaze imyaka yubaka izina binyuze mu ndirimbo ziganisha ku butumwa bw’ihumure, ibyiringiro no kwizera.

Mu ndirimbo ze zizwi harimo ‘Ntacyo Nzaba’, ‘Niyo Ndirimbo’, ‘Nkwite Nde’, ‘Nkurikira’ na ‘Buri Munsi’, zamufashije kugira abakunzi mu bice bitandukanye by’Isi.

Misigaro kandi amaze gukorana n’abahanzi bakomeye barimo Meddy, The Ben, Israel Mbonyi na Gentil Misigaro, bikomeza kwagura umuziki we no kuwugeza ku bantu batandukanye.

Uretse umuziki, Adrien Misigaro azwi no mu bikorwa bigamije gufasha urubyiruko. Mu 2019 yashinze umuryango Melody of New Hope (MNH) nyuma y’uruzinduko yagiriye mu Kigo Ngororamuco cya Iwawa, aho yatekereje ku bikorwa bifasha urubyiruko kwirinda ibiyobyabwenge no kwiyubakira ejo hazaza.

David Nduwimana, uzifatanya na Richard Nick Ngendahayo na Adrien Misigaro, ni umwe mu bahanzi bazaba bafite uruhare muri ibi bitaramo.

Kuba aba bahanzi batatu bazahurira ku rubyiniro muri Australia bitanga ishusho y’urugendo rwa Gospel nyarwanda rwambutse imbibi, aho indirimbo zakozwe n’Abanyarwanda zikomeje kubona umwanya mu bitaramo bihuza Abanyafurika baba mu mahanga.

‘African Gospel Echoes’, igitekerezo cyavutse hashize imyaka ibiri

Ibi bitaramo byateguwe ku bufatanye na Millenium Investment & Consulting, binyuze mu mushinga wa ‘African Gospel Echoes’.

Nadine Shema, umwe mu bateguye ibi bitaramo, aherutse kubwira InyaRwanda ko igitekerezo cyabyo cyatangiye kubakwa hashize imyaka ibiri, nyuma yo kubona ko umuziki wa Gospel ushobora kuba uburyo bwiza bwo guhuza abantu bakomoka mu bihugu n’imico itandukanye.

Yavuze ko we n’umugabo we bifuje kugira uruhare mu guteza imbere ibikorwa byo kuramya no guhimbaza Imana, bityo bahitamo gutangirira kuri uyu mushinga.

Ati: “N’ubwo dufite ibindi bikorwa dukora, njye n’umugabo wanjye twifuje kugira uruhare mu guteza imbere ibikorwa byo kuramya no guhimbaza Imana. Twahisemo gutangirira kuri uyu mushinga wa ‘African Gospel Echoes’ ugamije guhuza Australia na Afurika binyuze mu muziki.”

Nadine yasobanuye ko batagamije gukora igitaramo kimwe gusa, ahubwo ko bifuza ko ‘African Gospel Echoes’ yaba umushinga uhoraho uzajya uba buri mwaka, ugatumirwamo abahanzi baturuka mu Rwanda, muri Afurika y’Iburasirazuba ndetse no mu bindi bice bya Afurika.

Intego y’uyu mushinga ntigarukira ku gutegura ibitaramo. Abawutegura bashaka kubaka urubuga ruzajya ruhuza umuziki wa Gospel nyafurika n’abawukunda muri Australia.

Ni igitekerezo gishingiye ku kuba umuziki ushobora kurenga imipaka, ugahuza abantu bafite indimi, ibihugu n’imico bitandukanye ariko bafite ukwizera n’indangagaciro bahuriyeho.

Kuri benshi mu Banyafurika baba muri Australia, ibi bitaramo bishobora kuba umwanya wo kongera guhura n’umuco wabo no gusangira umwanya wo kuramya Imana, mu gihe ku bahanzi ari andi mahirwe yo kugeza umuziki wabo ku bantu baba kure y’iwabo.

Abifuza kuzitabira ibi bitaramo bashobora kubona amatike y’ubwoko bubiri. Itike isanzwe, izwi nka Regular, igura amadolari ya Australia 65, mu gihe iya VIP igura amadolari 100.

Brisbane ni ho hazatangirira uru rugendo ku wa 12 Nzeri, rukomereze i Melbourne ku wa 19 Nzeri, mbere yo gusorezwa i Sydney ku wa 26 Nzeri 2026.

‘African Gospel Echoes’ ishobora kuba intangiriro y’urubuga ruhoraho ruzajya ruhuza abahanzi ba Gospel bo muri Afurika n’abakunzi babo baba muri Australia, bityo umuziki ukomeze kuba ikiraro gihuza imigabane ibiri.

Abahanzi b’indirimbo zo kuramya no guhimbaza Imana, Richard Nick Ngendahayo na Adrien Misigaro bageze muri Australia aho bitabiriye ibitaramo bitatu bagiye kuhakorera mu rwego rwo gufasha abahatuye kuramya Imana

Adrien Misigaro, Richard Nick Ngendahimana na David Nduwimana bagiye gukorera ibitaramo bitatu muri Australia