Richard Nick Ngendahayo, Adrien Misigaro na David Nduwimana bataramiye muri Austaralia (AMAFOTO)

Igitaramo cya mbere cy’uru rugendo cyabereye ahazwi nka Bellbird Park mu Mujyi wa Brisbane ku wa 12 Nzeri 2026, kikaba cyarabaye intangiriro y’ibindi bitaramo bibiri biteganyijwe muri Melbourne na Sydney.

Ku wa 19 Nzeri 2026, aba bahanzi barongera bahurire ku rubyiniro muri Enjoy Church-Melton mu Mujyi wa Melbourne, mbere y’uko uru rugendo rusorezwa muri Hillsong Church-Waterloo mu Mujyi wa Sydney ku wa 26 Nzeri 2026.

Ibi bitaramo biri mu mushinga witwa ‘African Gospel Echoes’, wateguwe ku bufatanye na Millenium Investment & Consulting, ugamije gukoresha umuziki wa Gospel nk’ikiraro gihuza Afurika na Australia.

 ‘African Gospel Echoes’ ntabwo yateguwe nk’igitaramo gisanzwe cy’umuhanzi umwe uhamagara abakunzi be.

Ni umushinga uhuza abahanzi bafite amateka n’ubutumwa butandukanye, ariko bahuriye ku ntego yo gukoresha umuziki mu kuramya no guhimbaza Imana, ndetse no guhuza abantu bakomoka mu bihugu bitandukanye.

Ku Banyafurika baba muri Australia, by’umwihariko Abanyarwanda n’Abarundi, ibi bitaramo ni umwanya wo kongera guhura, gusangira ukwizera no kwishimira umuziki ubibutsa umuco n’amateka bakomokamo, nubwo baba kure y’ibihugu byabo.

Ku bahanzi, ni andi mahirwe yo kugeza ubutumwa bw’indirimbo zabo ku bantu baba ku wundi mugabane, mu gihe ku babiteguye ari intambwe yo kubaka urubuga rw’igihe kirekire rwahuza Gospel nyafurika n’abawukunda muri Australia.

Richard Nick, inkingi imaze imyaka muri Gospel nyarwanda

Muri aba bahanzi harimo Richard Nick Ngendahayo, umwe mu baramyi bamaze igihe kinini bafite umwanya ukomeye muri Gospel nyarwanda.

Yatangiye urugendo rwe rwa muzika mu ntangiriro z’imyaka ya 2000, kuva icyo gihe agenda yubaka izina binyuze mu ndirimbo zagiye zigaruka ku kwizera, kwiringira Imana no kuyegera.

Mu ndirimbo ze zamamaye harimo ‘Yambaye Icyubahiro’, ‘Mbwira Ibyo Ushaka’, ‘Ibuka’, ‘Gusimba Umwonga’, ‘Si Umuhemu’, ‘Ijwi Rinyongorera’, ‘Sinzakwitesha’, ‘Wemere Ngushime’ na ‘Intwari Batinya’.

Mu 2026, izina rye ryongeye kuvugwa cyane ubwo umuhanzi Gisa Cy’Inganzo yasubiragamo indirimbo ‘Intwari Batinya’, ibintu byagaragaje uburyo indirimbo za Richard Nick zakomeje kugira umwanya mu muziki wa Gospel nyarwanda n’igihe zimaze.

Mu kwitegura uru rugendo, Richard Nick yavuze ko ategereje guhura n’abakunzi be baba muri Australia. Yagize ati: “Ni ibitaramo bidasanzwe ngiye gukorera muri Australia.”

Yasabye abazitabira ibi bitaramo kuzafatanya na we mu mwanya wo kuramya no guhimbaza Imana.

Adrien Misigaro, Gospel ye yamugejeje ku migabane itandukanye

Adrien Misigaro na we ni umwe mu bahanzi b’Abanyarwanda bamaze kumenyekana cyane mu muziki wo kuramya no guhimbaza Imana.

Ubusanzwe atuye muri Leta Zunze Ubumwe za Amerika, aho amaze imyaka yubaka izina binyuze mu ndirimbo zibanda ku butumwa bw’ihumure, ibyiringiro no kwizera.

Mu ndirimbo ze zizwi harimo ‘Ntacyo Nzaba’, ‘Niyo Ndirimbo’, ‘Nkwite Nde’, ‘Nkurikira’ na ‘Buri Munsi’, zamufashije kugira abakunzi mu bice bitandukanye by’Isi.

Misigaro kandi amaze gukorana n’abahanzi batandukanye barimo Meddy, The Ben, Israel Mbonyi na Gentil Misigaro, bikomeza kwagura umuziki we no kuwugeza ku bantu benshi.

Uretse umuziki, Adrien Misigaro azwi no mu bikorwa bigamije gufasha urubyiruko. Mu 2019, yashinze umuryango Melody of New Hope (MNH), nyuma y’uruzinduko yagiriye mu Kigo Ngororamuco cya Iwawa, aho yatekereje ku bikorwa byafasha urubyiruko kwirinda ibiyobyabwenge no kwiyubakira ejo hazaza.

David Nduwimana na we ari mu rugendo

David Nduwimana ni undi muhanzi uri muri uru rugendo rw’ibitaramo muri Australia, aho ahurira kuri uru rubyiniro na Richard Nick Ngendahayo na Adrien Misigaro.

Kuba aba bahanzi batatu bahuriye muri uyu mushinga bigaragaza uko Gospel nyarwanda ishobora kurenga imbibi z’u Rwanda, ikagera ku Banyarwanda n’abandi Banyafurika baba mu bindi bihugu.

Ni urugendo rutuma indirimbo zakozwe n’Abanyarwanda zikomeza kumvikana mu bice bitandukanye by’Isi, ariko kandi rugatanga umwanya wo guhura hagati y’abahanzi n’abakunzi babo baba kure y’iwabo.

‘African Gospel Echoes’, igitekerezo cyatangiye kubakwa hashize imyaka ibiri

Nadine Shema, umwe mu bateguye ibi bitaramo, aherutse kubwira InyaRwanda ko igitekerezo cya ‘African Gospel Echoes’ cyatangiye kubakwa hashize imyaka ibiri.

Yavuze ko we n’umugabo we bifuje kugira uruhare mu guteza imbere ibikorwa byo kuramya no guhimbaza Imana, bakabona ko umuziki ushobora kuba uburyo bwiza bwo guhuza abantu bakomoka mu bihugu n’imico itandukanye.

Ati: “N’ubwo dufite ibindi bikorwa dukora, njye n’umugabo wanjye twifuje kugira uruhare mu guteza imbere ibikorwa byo kuramya no guhimbaza Imana. Twahisemo gutangirira kuri uyu mushinga wa ‘African Gospel Echoes’ ugamije guhuza Australia na Afurika binyuze mu muziki.”

Nadine yasobanuye ko badashaka ko uyu mushinga urangirira kuri ibi bitaramo bitatu gusa, ahubwo ko bafite igitekerezo cyo kuwugira igikorwa gihoraho gikorwa buri mwaka.

Intego ni ukuzajya hatumirwa abahanzi baturuka mu Rwanda, muri Afurika y’Iburasirazuba ndetse no mu bindi bice bya Afurika, kugira ngo Gospel nyafurika ibone urubuga ruhoraho muri Australia.

Umuziki nk’ikiraro hagati ya Afurika na Australia

Igitekerezo kiri inyuma ya ‘African Gospel Echoes’ gishingiye ku kuba umuziki ushobora kurenga imipaka, ugahuza abantu batandukanye mu rurimi, igihugu n’umuco, ariko bagahurira ku kwizera n’indangagaciro.

Ku Banyafurika baba muri Australia, ibi bitaramo bishobora kubaha umwanya wo kongera kwegera umuco n’umuziki bamenyereye, ndetse no guhura n’abandi basangiye inkomoko n’imyemerere.

Ku bahanzi na bo, ni urubuga rwo kugeza umuziki wabo ku bantu baba kure y’u Rwanda no gukomeza kubaka umubano n’abakunzi babo baba mu mahanga.

Uru rugendo rwatangiriye i Brisbane ku wa 12 Nzeri 2026, rukomereza i Melbourne ku wa 19 Nzeri, mbere yo gusorezwa i Sydney ku wa 26 Nzeri.

Abifuza kwitabira ibi bitaramo bashobora kubona amatike y’ubwoko bubiri. Itike isanzwe igura amadolari 65 ya Australia, mu gihe itike ya VIP igura amadolari 100.

‘African Gospel Echoes’ ishobora gukomeza kuba urubuga ruhuza abahanzi ba Gospel bo muri Afurika n’abakunzi babo baba muri Australia, umuziki ugakomeza kuba kimwe mu bikoresho bihuriza hamwe imigabane ibiri.

Umuramyi Richard Nick Ngendahayo yataramiye ku nshuro ye ya mbere mu gihugu cya Australia mu gitaramo cyahuje benshi

Richard ari mu rugendo rw'ibi bitaramo mu gihe anitegura kongera gutaramira i Kigali mu gitaramo kizabera muri BK Arena

Richard Nick Ngendahayo usanzwe ubarizwa muri Leta Zunze Ubumwe z'Amerika yataramiye muri Australia

Nadine Shema uri mu bagize uruhare mu gutegura iki gitaramo yashimye abahanzi baririmbye, ndetse n'abandi bose bakitabiriye

David Nduwimana umaze imyaka myinshi akorera umuziki muri Australia yataramiye amagana y'abantu muri iki gitaramo cyagutse