RIB yabitangaje mu ijoro ryo kuri uyu wa Kane ibinyujije ku rukuta rwayo rwa X aho yanditse iti "RIB ibisabwe n'Ubushinjacyaha, tariki ya 19 Kamena 2025, yatangije iperereza kuri INGABIRE Umuhoza Victoire mu rwego rwo gushyira mu bikorwa icyemezo cy'Urukiko Rukuru mu rubanza ruregwamo Sibomana Sylvain na bagenzi be, kugira ngo ashyikirizwe Urukiko".
Yavuze ko Ingabire Umuhoza Victoire akurikiranyweho hamwe na bagenzi be ibyaha birimo kurema umutwe w'abagizi ba nabi no gutegura ibikorwa bigamije gukurura imvururu muri rubanda. RIB yavuze ko afungiye kuri Sitasiyo yayo ya Remera mu gihe ategereje gushyikirizwa Ubushinjacyaha.
Ibi bije nyuma y'uko Ku wa kabiri w’iki cyumweru ari bwo Urukiko Rukuru rwa Kigali, rwategetse Victoire Ingabire kwitaba akabazwa mu rubanza rw’abantu icyenda barimo umunyamakuru Théoneste Nsengimana n’uwitwa Sylavain Sibomana bavuga ko yari abayoboye.
Yabwiye urukiko ko benshi mu baregwa gushaka guhirika ubutegetsi badakoresheje intwaro abazi ariko ko we cyangwa ishyaka rye, atigeze ategura amahugurwa yo gukora icyo gikorwa bashinjwa.