Rev. Dr. Nterinanziza afite impamyabumenyi y’Ikirenga (PhD) mu by’Ubumenyi bwa Theologiya yakuye muri Leta Zunze Ubumwe za Amerika, akaba azwi cyane mu bikorwa byo kwigisha Ijambo ry’Imana, ubujyanama mu by’umwuka, no guteza imbere imibereho myiza y’abaturage binyuze mu mahame ya Gikristo.
Ku Cyumweru, tariki ya 02 Werurwe 2026, yamuritse igitabo cye gishya mu muhango wabereye muri Dove Hotel i Kigali. Uyu muhango witabiriwe n’abayobozi b’amatorero, abarimu ba tewolojiya, inzobere mu buzima, abajyanama n’inshuti z’umuryango mugari wa Gikristo.
Mu bitabiriye harimo umwarimu wigisha tewolojiya mu mashuri makuru atandukanye, Madamu Sifa uzwi nk’inzobere mu buzima akaba n’umujyanama; Dorcas Ingabire, umufasha w’umuhanzi w’indirimbo zihimbaza Imana Papi Clever, hamwe n’abandi batumirwa batandukanye.
Mu ijambo rye, Rev. Dr. Serene Nterinanziza yavuze ko igitabo "Ijambo Rikiza" cyateguwe nk’umuyoboro w’inyigisho za Bibiliya uzamara umwaka wose, ugamije gufasha abizera gukira ibikomere byo mu mutima no mu buzima bw’umwuka binyuze mu mbaraga z’Ijambo ry’Imana.
Yagaragaje ko iki gitabo kirimo inyigisho zitunganijwe neza zigamije gukomeza ukwizera, kugarura ibyiringiro no gufasha abakristo gukura mu rugendo rwabo rw’umwuka.
Yanagaragaje ko iki gitabo cyanditswe mu ndimi eshatu arizo Icyongereza, Igifaransa n’Ikinyarwanda, kugira ngo kigere ku bantu benshi bashoboka. Uko giteguye bituma umusomyi ashobora gukurikira amasomo 12 agenewe amezi 12 y’umwaka, bityo buri kwezi kukaba urugendo rwihariye rwo gukira mu Ijambo ry’Imana muri izi ndimi uko ari eshatu.
Yagize ati: “Intego y’iki gitabo ni ugufasha abizera kugendera mu gukira, gusubizwamo imbaraga no gukomera mu kwizera binyuze mu Byanditswe Byera.”
Igitabo "Ijambo Rikiza" kiboneka ku rubuga rwa interineti www.ijamborikiza.com ndetse no kuri Amazon.com, bikorohereza abasomyi bo mu Rwanda no mu mahanga kukibona.
Iki gitabo cyanditswe kugira umwanditsi wacyo agire uruhare rukomeye mu gusakaza ubutumwa bwiza, bufasha abantu benshi kugera ku gukira ko mu mutima, gukura mu mwuka no kubaho ubuzima bushingiye ku Ijambo ry’Imana.
Umuhango wo kumurika iki gitabo wasojwe n’amasengesho, gusangira ibitekerezo no gushimira uruhare rw’ibitabo bya Gikristo n’itangazamakuru rya Gikristo mu gukomeza ukwizera kw’abaturage.
Rev. Dr. Serene Nterinanziza ni umupasitori ufite ubunararibonye mu ivugabutumwa, inyigisho za Bibiliya, ubuyobozi n’iterambere ry’abaturage rishingiye ku mahame ya Gikristo.
Afite Impamyabumenyi y’Ikirenga (PhD) muri tewolojiya yakuye muri Leta Zunze Ubumwe za Amerika, imuha ubushobozi buhambaye mu buyobozi bwa gikristo no kwigisha inyigisho z’iyobokamana ku rwego rwo hejuru.
Rev. Dr. Nterinanziza ni: Umuvugabutumwa (Evangeliste) wigisha ubutumwa bwiza agamije gukiza no kugarura abantu ku Mana; Umunyamakuru wa Gikristo utanga inyigisho n’ubutumwa bwubaka ukwizera; Umushoramari ushyigikira iterambere n’ubushobozi bw’ubukungu bw’abaturage;
Umugiraneza ugira uruhare mu bikorwa byo gufasha abatishoboye n’iterambere ry’imibereho myiza; Umujyanama mu by’umwuka, uherekeza abantu n’imiryango mu rugendo rwo gukura mu kwizera.
Umurimo we wibanda ku gukira ko mu mutima, gusana ubuzima bw’umwuka no gukomeza abizera binyuze mu gukoresha Ijambo ry’Imana mu buzima bwa buri munsi.
Imurikwa ry'igitabo cya Rev. Dr. Serene Nterinanziza ryitabiriwe n’abayobozi b’amatorero, abarimu ba tewolojiya, inzobere mu buzima, abajyanama n’inshuti z’umuryango mugari wa Gikristo