Iki gitaramo kizaba ku wa 25 Nyakanga 2026 muri Camp Kigali, kikaba ari bwo bwa mbere kizaba kibaye, aho kizahuriza hamwe abakunzi b'umuziki wo kuramya no guhimbaza Imana mu bihe byihariye byo kuyiramya.
Amatike yatangiye kugurishwa kuri uyu wa Gatatu, tariki ya 24 Kamena 2026, akaba aboneka binyuze ku rubuga www.renetracy.com cyangwa hakoreshejwe kode ya *550*2*2*111#. Abifuza kwitabira bashobora kugura itike ya 10,000 Frw cyangwa iya 25,000 Frw.
Uretse amatike asanzwe, René na Tracy banashyizeho uburyo bwihariye bwo gushyigikira iki gitaramo binyuze mu butumire "Invitations", buri kuboneka hakoreshejwe kode ya *550*2*3*9#.
Abifuza amakuru arambuye kuri iki gitaramo, basabwe guhamagara telefone zigendanwa zikurikira: +250 794 601 996 cyangwa +250 786 538 795.
Mu kiganiro yagiranye na InyaRwanda, René Patrick yavuze ko igitekerezo cyo gutangiza "In Christ Now Worship Experience" cyaturutse ku cyifuzo cyo gushyiraho urubuga ruhuriza hamwe abantu bifuza kugirana ibihe byimbitse n'Imana binyuze mu kuyiramya.
Yagize ati: "Twifuje ko habaho umwanya abantu bahuriramo nta kindi kibazanye uretse gusabana n'Imana nk'ingingo z'Umubiri umwe utuwemo na Kristo, ari na we Mutwe wawo."
Yakomeje avuga ko intego yabo ari ukubaka igicaniro cyo kuramya Imana gishingiye ku busabane na Yo no kunezererwa ubuzima bushya bubonerwa muri Kristo Yesu.
René na Tracy batangaje ko "In Christ Now Worship Experience" ari umushinga bifuza ko uzaba igikorwa ngarukamwaka, nubwo bavuga ko iyo biba bishoboka bakwishimira ko cyajya kiba kenshi kurushaho.
Bati: "Iyaba byakundaga, iki gitaramo cyajya kiba kenshi kandi kikabera ahantu henshi hashoboka kugira ngo abantu benshi baryoherwe n'ubuzima bubonerwa muri Kristo Yesu. Ariko mu gutangira, kizajya kiba buri mwaka uko Imana izakomeza kuduha ubuntu."
René Patrick yavuze ko bafite icyerekezo cyagutse kuri iki gitaramo, kuko bifuza ko kizagenda kiba ihuriro ry'abakunzi ba Kristo baturutse hirya no hino ku Isi.
Yagize ati: "Twizera ko kizakura kikarenga imbibi z'u Rwanda, kikitabirwa n'imbaga y'abantu baturutse impande zitandukanye z'Isi, bafite intego imwe yo kunezererwa ubuzima bubonerwa muri Kristo."
René yavuze ko iki gitaramo kizaba gitandukanye n'ibisanzwe, kuko kizamara amasaha menshi, abaramyi batandukanye bagasimburana baramya Imana nta guhagarara.
Yagize ati: "Iki kizaba ari igitaramo cyo gufungura ku mugaragaro uru rugendo rwa 'In Christ Now'. Tuzagira amasaha menshi yo kuramya no guhimbaza Imana, aho abaramyi baturuka mu Rwanda no hanze yarwo bazajya basimburana bayiramya."
Igitaramo "In Christ Now Worship Experience" kirimo gutegurwa na René & Tracy, bakaba baratewe inkunga n'ibigo bitandukanye birimo Rebirth Creatives, Salter, Hotel des Mille Collines na Honor Events, sosiyete itegura ibitaramo n'ibirori bya Gospel.
Imyanya y'ubuntu y'igitaramo cya Rene na Tracy yarashize yose, hatangiye kugurishwa amatike
Rene na Tracy bifuza ko iki gitaramo cyabo cyaba ikimenyetso cy'ubumwe bw'Abakristo ndetse kikaba urubuga rwo gufasha abantu benshi kwegera Imana
Abaramyi René & Tracy bashyize hanze amatike y'igitaramo "In Christ Now" kizabera muri Camp Kigali ku wa 25 Nyakanga 2026