Iki gitaramo ni kimwe mu bikorwa bizasoza icyumweru cyahariwe Kwita Izina, kikazahuza umuziki, umuco, ubukerarugendo no kubungabunga urusobe rw’ibinyabuzima.
1. Indirimbo abafana bazifuza kumva cyane
Abafana ba Rema bashobora kuba bategereje cyane kumva zimwe mu ndirimbo zamugize icyamamare ku rwego mpuzamahanga, zirimo “Calm Down,” “Dumebi,” “Soundgasm,” “Charm” n’izindi.
Byitezwe ko izo ndirimbo zizashyushya abakunzi be muri BK Arena, cyane cyane mu gihe abafana bazaba baririmbana na Rema amagambo baziziho.
2. Imyambarire ya Rema
Rema azwiho kugira imyambarire yihariye kandi itandukanye, akaba ari n’umwe mu bahanzi bakunze kwitabwaho kubera uburyo ahitamo kwigaragaza mu myambaro.
Yagiye agaragara mu birori bikomeye by’imideli, birimo Paris Fashion Week, aho imyambarire ye yakomeje kuvugwa na benshi.
I Kigali, abafana bazaba bafite amatsiko yo kureba icyo azaserukana kuri stage, kuko imyambarire ye ishobora kuba kimwe mu bizatuma igitaramo kirushaho kuba cyiza.
3. Uko azitwara ku rubyiniro
Stage performance ya Rema ni kimwe mu bintu bizaba bitegerejwe cyane.
Abafana bazifuza kubona uko azakoresha imbaraga mu kuririmba, kubyina no gukorana n’abafana bazaba bari muri BK Arena. Uburyo azahuza indirimbo ze, imbyino n’imikoranire n’abafana bishobora gutuma igitaramo kirushaho kuryoha.
4. Uko abafana b’i Kigali bazamwakira
Kigali imenyerewe mu kwakira no kuryoherwa n’ibitaramo bikomeye, aho abafana bakunze kugira uruhare runini mu gutuma umuhanzi yiyumva neza ku rubyiniro.
Mu gihe bishimiye umuhanzi, abafana bashobora kumufasha kuririmba, kubyina no gucana amatara ya telefoni, bikaba bishobora gutuma BK Arena isa neza cyane mu gihe cy’igitaramo.
5. Rema ashobora gufashwa n’Umunyarwanda kuri stage
Kimwe mu bintu bishobora kuryoshya stage i Kigali ni ukureba niba Rema azagira Umunyarwanda umufasha kuri stage, yaba mu kubyina, kuririmba cyangwa mu kindi gikorwa cy’imyidagaduro.
Rema azwiho gukora ibitaramo afite team nini imufasha ku rubyiniro, irimo ababyinnyi, DJ, MC n’abandi bantu bagira uruhare mu gutuma performance ye iba nziza.
Cyangwa se akiyambaza umwe mu bafana akamuha akanya ko gusangira na we urubyiniro.
Umuhango nyirizina wo Kwita Izina uteganyijwe ku wa 4 Nzeri 2026, mu gihe igitaramo cya Rema kikazaba ku wa 5 Nzeri 2026.
Bityo, usibye kuba abafana bazaba baje kureba Rema, iki gitaramo gishobora no kuba umwanya wo kwishimira ibikorwa by’icyumweru cyahariwe Kwita Izina mu buryo bw’imyidagaduro.
Rema i Kigali: Ibintu 5 udakwiye gucikwa mu gitaramo giherekeza ibirori byo Kwita Izina