Ku wa Kabiri w’iki Cyumweru ni bwo ikipe ya Real Madrid yatsinze Benfica igitego 1-0 mu mukino ubanza wa kamarampaka uzatanga ikipe yerekeza muri 1/8 cya UEFA Champions League ya 2025/2026.
Ubwo umukino wari ugeze ku munota wa 50, Vinicius arimo arishimira iki gitego yatsinze, yavuze ko yabwiwe amagambo akomeretsa n’umukinnyi wa Benfica, Gianluca Prestianni. Yahise ajya ku musifuzi amubwira ko uyu mukinnyi amukoreye irondaruhu amubwira ko ari inkende.
Vinicius yashatse kwanga gusubira mu kibuga dore ko umukino wamaze hafi iminota 10 wahagaze ndetse umusifuzi yakoze ikimenyetso kirwanya irondaruhu ariko ntiyatanga ikarita cyangwa ngo agire indi myanzuro afata bitewe n’uko nta bimenyetso bifatika yari afite ko byabayeho koko.
Gianluca Prestianni w'imyaka 20 mu butumwa yatanze binyuze ku mbuga nkoranyambaga yarabihakanye ahubwo avuga ko abakinnyi ba Real Madrid bamukoreye irondaruhu.
Kuri ubu Real Madrid yatangaje ko ku munsi w'ejo yatanze ibimenyetso byose bisabwa mu Impuzamashyirahamwe y’umupira w’amaguru ku mugabane w’Iburayi kugira ngo hakorwe iperereza.
Yavuze ko irimo irakorana UEFA muri iri perereza ku bikorwa bidakwiye by’ivangurahu ryabaye mu mukino wayo na Benfica.
Yashimiye ko umuryango w’Isi yose w’umupira w’amaguru ukomeje kuba inyuma ya Vinicius ndetse ivuga ko izakomeza gufatanya n’inzego bireba mu kwamagana irondaruhu.
Real Madrid yavuze ko yatanze ibimenyetso ngo hakorwe iperereza ku kibazo cya Vinicius wakorewe irondaruhu