Umwe mu bayobozi muri Minisiteri y’Uburezi yabwiye Reuters ko ubuyobozi bwahisemo ko amashuri akomeza gukora, kuko bwabonye ko ingaruka zo gukoresha uburyo bwo kwigisha abana bari mu ngo zishobora kuba mbi kurusha ibyago byo kuba Ebola yakwirakwira mu mashuri.
Imibare ya Guverinoma yashyizwe ahagaragara kuri uyu wa Gatatu igaragaza ko umubare w’abantu bamaze guhitanwa na Ebola muri iki cyorezo urenga 3,000. Iki ni cyo cyorezo cya Ebola kimaze guhitana abantu benshi mu mateka y’icyorezo cya Ebola muri RDC.
Kugeza ubu, abantu banduye Ebola bamaze kugaragara mu ntara esheshatu, aho abagera kuri 48.6% mu bamaze kwandura bahitanwa n’iyi ndwara.
Amashuri arenga 1,000 ari mu duce twugarijwe cyane
Inyandiko ya Minisiteri y’Uburezi RDC yabonywe na Reuters igaragaza ko amashuri arenga 1,000 yo mu ntara ya Ituri abarirwa mu duce twashyizwe ku rwego rw’ahantu hashobora kwandura Ebola ku buryo bukomeye cyangwa ahari abantu bakomeje kuyandura.
Ku wa 19 Kanama, Minisiteri y’Uburezi yari yategetse ko amashuri ari muri utwo duce ahagarika amasomo asanzwe, ahubwo abanyeshuri bakigira kure.
Iyo gahunda yari gushingiye ku guha abanyeshuri impapuro z’imyitozo buri byumweru bibiri, ndetse no gukoresha radiyo na televiziyo mu gutambutsa amasomo.
Ariko ubuyobozi bwaje guhindura uwo mwanzuro, amashuri yo muri Ituri asubukura amasomo nk’uko bisanzwe muri iki cyumweru.
Umukozi wa Minisiteri y’Uburezi yavuze ko Guverinoma yasubiye ku cyemezo cyayo cya mbere nyuma y’ubusabe bw’abayobozi b’intara, bari bafite impungenge ko abanyeshuri bo mu duce twibasiwe na Ebola bashobora gusigara inyuma mu masomo ugereranyije n’abandi banyeshuri.
Uwo muyobozi yavuze ko mu gihe hagaragara umuntu wanduye Ebola, amashuri ashobora kongera gufungwa ndetse hagashyirwa mu bikorwa gahunda yo kwigisha abana bari mu ngo.
Amashuri yo muri Kivu na yo yongeye gufungura
Amashuri yongeye gufungurwa no mu bice by’intara za Kivu y’Amajyaruguru na Kivu y’Amajyepfo bigenzurwa n’umutwe wa AFC/M23.
Ubuyobozi bw’uyu mutwe bwatangaje ko amashuri yongeye gukora, mu gihe hashyizweho ingamba zo gukumira ikwirakwira rya Ebola.
Muri izo ngamba harimo gukaraba intoki no kubahiriza intera hagati y’abanyeshuri mu mashuri.
Ababyeyi baracyafite impungenge
Nubwo amashuri yongeye gufungura, ababyeyi baracyahangayikishijwe n’umutekano w’abana babo. Mu mujyi wa Beni, mu ntara ya Kivu y’Amajyaruguru, umwe mu babyeyi yavuze ko yashyiriye abana be batatu imiti isukura intoki mbere yo kubohereza ku ishuri.
Yasabye kandi ko ingamba zo kubahiriza intera hagati y’abanyeshuri zashyirwa mu bikorwa neza, kugira ngo abana batandurira Ebola ku ishuri.
Mu mashuri, abanyeshuri basabwa gukaraba intoki cyangwa gukoresha imiti isukura intoki, ndetse hakaba harashyizweho ibikoresho by’isuku mu mashuri ari mu duce twugarijwe cyane.
Ebola ikwirakwira cyane binyuze mu gukorana n’amazi yo mu mubiri w’umuntu wanduye. Icyorezo kiri muri RDC kuri iyi nshuro giterwa n’ubwoko bwa Bundibugyo, kandi kugeza ubu nta rukingo cyangwa umuti byemewe byihariye kuri ubu bwoko bwa Ebola.