Iki gikorwa kizaba ku wa Gatanu w’iki Cyumweru tariki ya 13 Werurwe 2026 ku cyicaro cya Rwanda Social Security Board (RSSB). Iki gikorwa kizahuza inzobere z’Abanyarwanda zigira uruhare mu gusangiza ibindi bihugu ubunararibonye bw’u Rwanda mu nzego zitandukanye, binyuze mu biganiro, ingendo zo gusura ibikorwa by’iterambere ndetse n’ibindi bikorwa byigisha.
Rwanda Cooperation Initiative (RCI) ifite itsinda rigari ry’abahanga b’Abanyarwanda bagera kuri 297, bagira uruhare mu kwakira no gusobanurira intumwa zituruka mu mahanga uko u Rwanda rwashyize mu bikorwa gahunda zarwo z’iterambere.
Kuva RCI yashyirwaho mu 2018, imaze kwakira amatsinda y’intumwa 845 yaturutse mu bihugu 70 byo hirya no hino ku isi ndetse no mu miryango 5 yo ku rwego rw’akarere. Muri rusange, abantu 9,790 ni bo bamaze gusura u Rwanda binyuze muri gahunda zo gusangiza ubunararibonye.
Ibi bikorwa byagize uruhare mu kugaragaza ubunararibonye bw’u Rwanda mu miyoborere, iterambere n’ikoreshwa ry’ikoranabuhanga mu gutanga serivisi.
Raporo y’ikorwa ry’uru rwego igaragaza ko mu mwaka w’ingengo y’imari wa 2024–2026, abitabiriye izi gahunda bagaragaje igipimo cy’ishimwe cya 89.9%, bigaragaza ko banyuzwe n’uburyo bakiriwe ndetse n’ubumenyi bahawe.
Iki gikorwa ngarukamwaka kizaba n’umwanya wo gushimira abatanga ibiganiro n’abafasha mu bikorwa bya RCI, bitewe n’uruhare rukomeye bagize mu gutuma u Rwanda rukomeza kumenyekana ku rwego mpuzamahanga nk’igihugu gisangira ubunararibonye n’ibindi.
Nanone kizafasha gukusanya ibitekerezo n’inama zafasha kunoza ireme ry’ibiganiro n’uburyo ibikorwa byo gusangira ubumenyi bikorwa, kugira ngo serivisi zitangwa zirusheho kuba nziza.
Iki gikorwa kiri mu rwego rwo gushyira mu bikorwa gahunda ya RCI ya 2025–2026, igamije kongera ubushobozi bw’uru rwego mu gutanga serivisi zo ku rwego rwo hejuru mu gusangiza ibindi bihugu ubunararibonye bw’u Rwanda.
U Rwanda rukomeje gusangiza amahanga ikoranabuhanga rwarwo binyuze mu bufatanye bwa South-South Cooperation na Triangular Cooperation, RCI imaze gufasha u Rwanda gusangiza ibindi bihugu zimwe muri sisiteme z’ikoranabuhanga zifasha mu micungire y’imari n’imisoro.
Muri zo harimo IFMIS, Umucyo, EBM ndetse na E-Tax, zimaze gutangira gukoreshwa mu bihugu birimo Chad, Guinea, Eswatini n’icyirwa cya Jamaica.
Raporo y’umwaka wa 2024–2025 igaragaza ko gahunda z’ikorwa na RCI zagezweho ku kigero cya 85%, hanasinywa amasezerano y’ubufatanye n’ibihugu n’ibigo bitandukanye. Byongeye kandi, 87.4% by’ibigo byitabiriye gahunda zo gusangiza ubumenyi byagaragaje ko byashyize mu bikorwa amasomo byigiye ku Rwanda.
RCI yatangaje ko igiye guhuriza hamwe abantu batanga ibiganiro mu gusangiza amahanga ubunararibonye ku Rwanda