Ni mu mukino wakinwe kuri uyu wa Gatatu guhera saa Cyenda n’iminota 30 kuri Kigali Pele Stadium. Watangiye wihuta cyane ubundi ku munota wa 3 Al Hilal ifungura amazamu ku mupira abakinnyi bayo bazamukanye biruka bawuhindura imbere y’izamu Aziz Bassane awukoraho nabi usanga Girumugisha awuha Yagoub Omer Taha awushyira mu nshundura.
Iyi kipe yo muri Sudani yakomeje gusatira binyuze ku barimo kapiteni wayo Yagoub Omer Taha n’ubundi ariko bikarangira ba myugariro ba Rayon Sports bihagazeho.
Rayon Sports nayo yatangiye kubaka ndetse igasatira binyuze ku ruhande rw’iburyo rwariho Aziz Bassane washoboraga no kububyaza umusaruro akabona igitego cyo kwishyura.
Ku munota wa 22, Rayon Sports yabonye uburyo ku mupira Bigirimana Abedi yari abonye ariko atera ishoti ryoroheje umunyezamu arikuramo. Umukino wakomeje urimo imbaraga nyinshi no guhangana bigatuma abakinnyi bamwe babona n’amakarita y’imihondo.
Mbere y’uko igice cya mbere kirangira, Rayon Sports yabonye uburyo ku mupira wavuye muri koroneri yatewe na Mugisha Didier ubundi Bigirimana Abedi ashyiraho umutwe ariko birangira umunyezamu awufashe. Igice cya mbere cyarangiye Al Hilal ikiyoboye n’igitego 1-0.
Murera yaje mu gice cya kabiri ibona uburyo kuri kufura yari iteretse ahantu heza ariko Emery Nayisenge ayitera mu rukuta.
Ku munota wa 55 Al Hilal yaje ikora impinduka mu kibuga havamo Yagoub Omer Taha, Petrus Aprocius na Kamaradini Mamudu hajyamo Yasir Boshara Omer, Sunday Damilaire na Ahmed Salem.
Yasir Boshara Omer yahise arata uburyo ku mupira mwiza yari ahinduriwe imbere y’izamu ariko awutera hejuru.
Ku munota wa 65 Aziz Bassane yarase uburyo buremereye ku mupira mwiza yari abonye ari mu rubuga rw’amahina ariko arekura ishoti mu maguru ya ba myugariro ba Al Hilal.
Rayon Sports nayo yaje gukora impinduka mu kibuga havamo Tambwe Gloire hajyamo Likau Kitoko naho Yannick Bangala aha umwanya Ndayishimiye Richard.
Ku munota wa 77 Rayon Sports yabonye igitego cyo kwishyura gitsinzwe na Likau Kitoko akoresheje umutwe.
Rayon Sports yashoboraga kubona igitego cya kabiri nk'aho Ndayishimiye Richard yazamuye neza umupira ariko umunyezamu wa Al Hilal aratabara. Aziz Bassane yaje guhabwa ikarita y'umutuku.
Umukino warangiye Rayon Sports y'abakinnyi 10 inganyije na Al Hilal ihita igira amanota 36 ijya ku mwanya wa 3 aho irushwa amanota 3 na APR FC. Al Hilal yo yakomeje ku mwanya wa mbere n’amanota 42.
Likau yishimira igitego yatsinze
Rayon Sports yanganyije na Al Hilal 1-1