Rayon Sports yahagurutse ku kibuga mpuzamahanga cy’indege cya Kigali kiri i Kanombe mu gitondo cyo kuri uyu wa Mbere tariki ya 31 Kanama 2026.
Iyi kipe yajyanye abakinnyi 20 batarimo abashya batatu iheruka gusinyisha ari bo Mohamed Ouattara, Sandja Bula na Elie Mukono Eldinho. Mu bandi itajyanye harimo Ndayishimiye Didier na Tony Kitoga.
Biteganyijwe ko ikipe ya Rayon Sports iri buce ahitwa Bangui ikabona gukomeza i Yaoundé muri Cameroun.
Iyi kipe izakina na Panthère Sportive du Ndé ku wa Gatanu saa Kumi n’igice z’i Kigali, umukino wo kwishyura uzabe ku wa Gatandatu w’Icyumweru gitaha saa Kumi n'Ebyiri z’Umugoroba muri Stade Amahoro.
Ntabwo ari ubwa mbere Rayon Sports igiye guhura na Panthère Sportive du Ndé kuko bigeze guhura mu ijonjora ry’ibanze rya CAF Confederation Cup mu 2015.
Icyo gihe Rayon Sports yatsinze umukino ubanza wabereye i Douala ku gitego 1-0 cyatsinzwe na Léo Uwambajimana, mbere yo kongera gutsindira i Kigali igitego 1-0 cya Isaac Muganza.
Rayon Sports nikomeza izahura n'ikipe izakomeza hagati ya Atomic Ngomé yo mu birwa bya Comoros na Black Bulls yo muri Mozambique.
Mu mwaka ushize Rayon Sports yasezerewe mu ijonjora rya mbere rya CAF Confederation Cup ikuwemo na Singida Black Stars yo muri Tanzania ku giteranyo cy’ibitego 3-1.
Amakipe azaviramo mu majonjora y’aya marushanwa yombi azahabwa ibihumbi 100$ [146.361.500 Frw], yo kwita ku ngendo n’indi myiteguro y’irushanwa.