Rutanga Eric usanzwe ari umutoza mukuru wa Imanzi FC ndetse wanakiniye APR FC na Rayon Sports, yatangaje ibi mu kiganiro yahaye InyaRwanda Sports TV mbere y’uyu mukino utegerejwe na benshi uzabera kuri Stade Amahoro kuri uyu wa Gatandatu saa 18:00.
Uyu wahoze ari myugariro w’ibumoso yavuze ko nubwo umukino uzaba ukomeye, Rayon Sports ifite inyota nyinshi yo kwegukana igikombe kuko ari yo nzira isigaye kugira ngo ibone itike yo guhagararira u Rwanda muri CAF Confederation Cup.
Yagize ati: “Umukino uzaba ukomeye kurusha uheruka, Rayon Sports irashaka gusohoka mu gihe APR FC yo ifite itike. Ngendeye ku ntego z’amakipe ndetse n’umutoza Haringingo, amahirwe yo gutwara igikombe ndayaha Rayon Sports.”
Rutanga Eric kandi yavuze ko mu bakinnyi 11 beza bahuriweho n’aya makipe yombi, Rayon Sports yagiramo abakinnyi batandatu.
Abo ni Kwizera Olivier, Emery Bayisenge, Diagne, Kitoga, Bassane na Asman, mu gihe APR FC yahagararirwa na Kagege, Niyomugabo, Ssekiganda, Dauda na Ouattara.
Yagize ati: “Mu bakinnyi 11 uteranyije amakipe yombi harimo batandatu ba Gikundiro.”
Rutanga Eric yakiniye APR FC hagati ya 2013 na 2017 mbere yo kwerekeza muri Rayon Sports yayikiniye kuva mu 2017 kugeza mu 2020.
Mu mateka y’Igikombe cy’Amahoro, APR FC ni yo ikipe imaze kucyegukana inshuro nyinshi, mu gihe Rayon Sports nayo iri mu makipe akunze kwitwara neza muri iri rushanwa.
Izi kipe zombi zisanzwe ari abakeba, ibintu bituma umukino wa nyuma utegerezanyijwe amatsiko menshi n’abakunzi b’umupira w’amaguru mu Rwanda.
REBA IKIGANIRO RUTANGA ERIC YAGIRANYE NA INYARWANDA SPORTS AVUGA KURI DERBY YA RAYON SPORTS NA APR FC