Rayon Sports yashimiye byihariye abafana bayo bo muri Mozambique

Ni ibikubiye mu ibaruwa iyi kipe yabandikiye mu gitondo cyo kuri uyu Kabiri tariki ya 27 Ukwakira 2026. Muri iyi baruwa Rayon Sports yagize ati: ”Ubuyobozi bwa Association Rayon Sports burabashimira byimazeyo ubwitange, urukundo n'ubufasha mwagaragarije ikipe yacu ya Rayon Sports FC mu gihe yari muri Mozambique”.

Yakomeje igira iti: ”Turabashimira by'umwihariko uburyo mwakiriye ikipe kuva ku munsi wa mbere yahageraga, mukayiba hafi, mukaza kuyishyigikira kuri stade no kuyitera ingabo mu bitugu. Uburyo mwagaragaje ko muri kumwe na Rayon Sports, nubwo ikipe yari mu gihugu cy'amahanga, ni ikimenyetso gikomeye cy urukundo mufitiye ikipe yacu”.

Murera yashimiye buri umwe wagize uruhare mu gufasha ikipe mu buryo butandukanye. Ati: ”Turashimira kandi buri wese wagize uruhare mu gufasha ikipe mu buryo butandukanye, kuko ubufasha bwanyu bwagize uruhare rukomeye mu korohereza ikipe no gutuma yumva iri mu muryango wayo, nubwo yari kure y'u Rwanda.

Mwaduhaye urugero rwiza rw'ubwitange, ubufatanye n'ubudahemuka biranga umuryango mugari wa Rayon Sports. Ubufasha bwanyu ntibuzibagirana, kandi turizera ko umubano n'ubufatanye hagati yacu bizarushaho gukomera”.

Muri ubu butumwa Murera yanyujije ku mbuga nkoranyambaga zayo, yasoje igira iti: ”Mu izina ry'ubuyobozi, abakinnyi, abatoza n'umuryango wose wa Rayon Sports, tubashimiye tubikuye ku mutima”.

Rayon Sports yashimiye aba bafana nyuma y’uko isezerewe na Black Bulls yo muri Mozambique mu ijonjora rya kabiri rya CAF Confederation Cup. Mu mukino ubanza wabereye i Kigali yatsinzwe ibitego 2-0 naho muwo kwishyura wabereye i Maputo inganya ibitego 2-2 ihita isezererwa ku giteranyo cy’ibitego 4-2.

Rayon Sports yashimiye abafana bayo bo muri Mozambique