Kuri uyu wa Gatanu saa Kumi n'Ebyiri muri Stade Amahoro hakinwe umukino wa nyuma wa CECAFA Kagame Cup 2026 yari imaze igihe ibera mu Rwanda. Rayon Sports yatssinze Gor Mahia yo muri Kenya ibitego 2-1 yegukana igikombe yaherukaga mu 1998.
Iyi ntsinzi yakiriwe nk'ishema ku Rwanda, aho abafana n'abakunzi b'umupira w'amaguru bakomeje gushimira abakinnyi, abatoza n'ubuyobozi bw'iyi kipe ku rugendo rwabagejeje ku gikombe.
Mu bishimiye iyi ntsinzi harimo na Minisitiri w'Ubutegetsi bw'Igihugu, Dominique Habimana, wanyujije ubutumwa bwe kuri X avuga ko ko Rayon Sports yahesheje Abanyarwanda Umuganura wizihijwe kuri uyu wa Gatanu mu gihugu hose.
Minisitiri Habimana yagize ati: "Oh Rayooon! Murakoze guha Abanyarwanda Umuganura. Muduhesheje ishema twese mugumisha iki gikombe gifite izina twubaha hano iwacu." Yongeyeho ati: "Guca ibyuma bizanye n'intsinzi ikomeye".
Rayon Sports yitwaye neza kuva irushanwa ritangiye, ikomeza kwerekana urwego rwo hejuru kugeza yegukanye igikombe cya CECAFA Kagame Cup 2026, irushanwa rihuza amakipe akomeye yo mu Karere ka Afurika y'Iburasirazuba n'iyo Hagati.
Iki gikombe nticyabaye intsinzi ya Rayon Sports gusa, ahubwo cyabaye ishema ku mupira w'amaguru w'u Rwanda muri rusange. Cyongeye kugaragaza ko amakipe y'u Rwanda ashobora guhangana ku rwego rw'akarere no guhesha igihugu ishema.
Abakunzi ba Rayon Sports bakomeje kwishimira iyi ntsinzi, bizeye ko izabera ikipe intangiriro y'ibindi bikombe no gukomeza kwitwara neza mu marushanwa ari imbere.
Rayon Sports yanditse amateka ndetse ihesha ishema u Rwanda