Ni mu mukino wo ku munsi wa gatatu wo mu Itsinda A wakinwe kuri uyu wa Kabiri saa Cyenda kuri Kigali Pele Stadium.
Rayon Sports yasabwaga gutsinda uyu mukino yatangiye iri hejuru binyuze ku bakinnyi bayo nka Coralie Odette ariko ba myugariro ba Yei Joint Star FC bari barangajwe imbere na kapiteni Sumaya Malili Taban.
Ku munota wa 29 Coralie Odette yongeye kubona uburyo ariko abupfusha ubusa.
Mbere y’uko igice cya mbere kirangira Mukeshimana Dorothee yashoboraga kunyeganyeza inshundura ku mupira yari ahinduye ariko unyura impande y’izamu gato cyane.
Mu gice cya kabiri Rayon Sports WFC yaje ikora impinduka mu kibuga havamo Coralie Odette hajyamo Ishimwe Mizero Evelyne.
Yei Joint Star FC nayo yahise ikora impinduka mu kibuga havamo Poni Esther Joseph na Anzoo Esther hajyamo Adong Albert Joan na Mary Anger Bol.
Ku munota wa 46, Ukwikunda Jeannette wa Rayon Sports WFC yahise afungura amazamu.
Ku munota wa 79 Moureen Nankinga wari winjiye mu kibuga asimbuye yatsinze igitego cyo kwishyura cya Yei Joint Star FC, umukino urangira amakipe yombi anganya 1-1.
Rayon Sports WFC yahise iba iya kabiri mu itsinda A n’amanota atanu, ikurikirwa na Mafunzo yagize amanota ane imaze kunyagira Danden ya nyuma ibitego 9-0.
Nubwo iyi kipe yabaye iya kabiri yahise isezererwa kuko mu kureba ikipe ya kabiri yitwaye neza bakuramo amanota yabonye ku ikipe ya nyuma, kubera ko amatsinda yandi afite amakipe atatu, bivuze ngo irasigarana amanota 2 kandi hari andi makipe afite atatu.
Rayon Sports WFC yasezerewe mu irushanwa ryo gushaka itike ya CAF Champions League
