Kuri uyu wa Gatanu tariki 29 Gicurasi 2026 Ishyirahamwe ry'umupira w'amaguru mu Rwanda (FERWAFA) ryatangaje ko Umunya Brazil Ramos Dal Salio Rogerio yagizwe Umutoza mushya w'Abanyezamu mu Amavubi.
Uyu mutoza w’imyaka 52 afite ubunararibonye mu gutoza abanyezamu mu bihugu no mu makipe atandukanye. Yabaye umutoza w’abanyezamu b’Ikipe y’Igihugu y’u Buhinde ndetse anakorera Ikipe y’Igihugu ya Pakistan.
Yanatoje mu makipe akomeye yo mu Buhinde arimo Mumbai City FC na Odisha FC, ndetse ananyura mu makipe yo muri Brazil, Cyprus na Sudani.
Ramos azwiho kuzamura urwego rw’abanyezamu no gukorana ubunyamwuga n’abatoza bakomeye, ibintu byatumye yubahwa cyane mu mupira w’amaguru wo muri Aziya.
Asimbuye Mugabo Alexis watangiye gukorera amakipe y’Igihugu mu 2018 atoza abanyezamu b’Amavubi y’abatarengeje imyaka 17 na 20, mbere yo kugera mu Amavubi Nkuru mu mwaka wa 2021.
Ishyirwaho rya Ramos rije mu gihe Amavubi akomeje kwitegura imikino ya Gicuti ya Tanzania na Comoros, aho hitezwe ko azazana ubunararibonye n’ubumenyi bushya mu kuzamura urwego rw’abanyezamu b’u Rwanda.
Umunya Brazil Ramos Dal Salio Rogerio yagizwe Umutoza w'Abanyezamu mu Amavubi
Mugabo Alexis niwe wari usanzwe ari Umutoza w'abanyezamu mu Amavubi