Ni umukino wabaye kuri iki Cyumweru saa Kumi n'ebyiri n'iminota 30 ku kibuga cya Liverpool, Anfield.
Ikipe ya Liverpool yatangiye umukino iri hejuru dore ko mu munota umwe gusa yari imaze kubona kufura na koroneri nubwo nta cyavuyemo.
Liverpool niyo yakomeje gukina ihererekanya gusa ku munota wa 9 Manchester United yageze mu rubuga rw'amahina Garnacho abona uburyo ariko arekuye ishoti rinyura kure y'izamu.
Abakinnyi ba Liverpool bakomeje gukina biharira umupira cyane baciriye umurongo ntarengwa Manchester United arinako babona koroneri nyinshi gusa kuzibyaza umusaruro ngo bafungure amazamu bikagorana.
Ku munota wa 41 Mohammed Salah yagerageje kurekura ishoti ku mupira yari ahawe na Szoboszlai ariko Andre Onana aba hafi arikuramo.
Mu gice cya kabiri Manchester United yaje ikomeza gukina nk'idahari ariko Liverpool nayo gutsinda bikaba ikibazo.
Ku munota wa 55 Mohammed Salah yarekuye ishoti riremeye ariko Andre Onana akomeza kuba ibamba. Jurgen Klopp yaje gukora impinduka mu kibuga akuramo Ryan Gravenberch na Dominic Szoboszlai yinjizamo Cody Gakpo na Joe Gomez agira ngo abone igitego gusa biranga.
Ku munota wa 83 Joe Gomez yari anyeganyeje inshundura habura gato ku mupira uremereye yarekuye ariko unyura impande y'izamu gato cyane.
Ba myugariro ba Manchester United bakoze akazi gakomeye birangira nta gitego binjijwe banganyije 0-0 na Liverpool.
Uku gutakaza amanota kuri Liverpool byatumye ihita unatakaza umwanya wa mbere ijya kuwa Kabiri n'amanota 38 aho irushwa na Arsenal ya mbere inota 1.
Liverpool yarase ibitego byinshi imbere y'izamu
Ikipe ya Manchester United yihagazeho inganya na Liverpool