Umukino watangiye urimo imbaraga nyinshi cyane ndetse no guhangana ku mpande zombi bigatuma habaho amakosa dore ko mu minota 13 gusa abakinnyi batatu bari bamaze kubona amakarita y’imihondo.
Arsenal yakinaga yiharira umupira ari na ko igera imbere y’izamu rya Chelsea nk'aho Bukayo Saka yarekuye ishoti riremereye ariko umunyezamu agatabara.
Chelsea nayo yanyuzagamo bitari kenshi ikabona uburyo imbere y’izamu nk'aho Estavao yabonye umupira mu rubuga rw’amahina ariko yarekura ishoti rikanyura hejuru y’izamu kure.
Ku munota wa 38 Moises Caisedo yeretswe ikarita y’umutuku ku ikosa yakoreye Mikel Merino. Nyuma y’uko abakinnyi ba Chelsea basigaye ari 10 mu kibuga, Arsenal yakomeje kwatsa umuriro imbere y’izamu nk'aho Declan Rice yahaye umupira mwiza Gabriell Martinelli arekura ishoti ariko umunyezamu aratabara.
Igice cya mbere cyarangiye amakipe yombi anganya 0-0. Mu gice cya kabiri impande zombi zaje zikora impinduka mu kibuga aho ku ruhande rwa Chelsea havuyemo Estavao hajyamo Alejandro Garnacho naho ku ruhande rwa Arsenal havamo Riccardo Calafiori hajyamo Lewis -Skelly.
Bidatinze ku munota wa 48 Chelsea yahise ifungura amazamu ku gitego cya Trevoh Chalobah akoresheje umutwe kuri koroneri yatewe na Reece James. Arsenal yaje kwishyura ku munota wa 59 ku gitego cya Mikel Merino nawe akoresheje umutwe ku mupira watewe na Bukayo Saka.
Impande zombi zashatse igitego cy’intsinzi kirabura ubundi birangira amakipe yombi anganya 1-1. Arsenal yakomeje kuba ku mwanya wa mbere n’amanota 30 naho Chelsea yo ikomeza kuba ku wa gatatu n’amanota 24.
Mu yindi mikino yabaye Manchester United yatsinze Crystal Palace ibitego 2-1 naho Liverpool itsinda West Ham United ibitego 2-0.
Chelsea yanganyije na Arsenal 1-1
Arsenal yananiwe kwikura imbere ya Chelsea y'abakinnyi 10