Nyuma y’uko Mohamed Salah, wegukanye iki gihembo inshuro 4, atakiri muri Liverpool, amahirwe ya Haaland asa n’aho yiyongereye. Icyakora, hari abandi bakinnyi benshi bashobora kumubangamira mu rugamba rwo gushaka umwanya wa mbere mu batsinze ibitego byinshi, nk’uko tubikesha BBC Sport.
Erling Haaland – Manchester City
Haaland w’imyaka 26 ni we mukinnyi uhagaze imbere mu bahabwa amahirwe yo kwegukana Golden Boot.
Uyu munya-Norway amaze gutsindira iki gihembo inshuro 3 mu myaka ine amaze muri Premier League. Muri shampiyona ye ya mbere, 2022/23, yatsinze ibitego 36, aba umukinnyi watsinze byinshi mu mwaka umwe kuva Premier League yatangira.
Mu bihe bibiri byakurikiyeho, yatsinze ibitego 27 buri mwaka, ndetse yegukana Golden Boot. Muri rusange, Haaland amaze gutsinda ibitego 112 mu mikino 132 ya Premier League, imibare igaragaza impamvu ari we ukomeje gufatwa nk’umukandida wa mbere.
Alexander Isak – Liverpool
Alexander Isak w’imyaka 26 ni umwe mu bakinnyi bashobora guhangana na Haaland, cyane cyane iyo ashoboye gukina imikino myinshi adafite imvune. Ari ku mwanya wa kabiri ku rutonde rw’abatsinze ibitego byinshi muri Premier League muri shampiyona ya 2024/25, aho yatsinze 23, asigara inyuma ya Mohamed Salah.
Icyakora, shampiyona ishize ntiyamugendekeye neza kubera imvune. Nyuma yo kujya muri Liverpool avuye muri Newcastle ku mafaranga agera kuri £125m, Isak yatsinze ibitego 4 gusa mu mikino 22 yakinnye mu marushanwa yose.
Igor Thiago – Brentford
Uyu munya-Brazil w’imyaka 25 yatsinze ibitego 22 muri Premier League muri shampiyona ye ya mbere yuzuye akina mu Bwongereza, nyuma yo kuba yaragize imvune yamubujije gukina igihe kinini mu mwaka wabanje.
Yarangije ku mwanya wa kabiri inyuma ya Haaland ku rutonde rwa Golden Boot. Umusaruro we watumye ahamagarwa mu ikipe y’igihugu ya Brazil, nubwo yari atarakinira igihugu cye mbere y’uyu mwaka.
João Pedro – Chelsea
Uyu mukinnyi w’imyaka 24 yinjira muri uru rutonde nyuma yo gutsinda ibitego 15 muri Premier League muri shampiyona ishize. Yiteguye kongera kwigaragaza muri Chelsea nyuma yo kuva muri Brighton.
Ariko uyu mwaka ashobora guhura n’ipiganwa rikomeye ku mwanya w’umukinnyi ukina imbere, kuko Chelsea ifite abandi bakinnyi bashobora gukina nka rutahizamu, barimo Danny Welbeck.
Viktor Gyökeres – Arsenal
Uyu mukinnyi w’imyaka 28 na we ari mu bakinnyi bashobora kwinjira mu rugamba rwa Golden Boot. Mu mwaka we wa mbere muri Arsenal, uyu munya-Sweden yatsinze ibitego 14 muri Premier League, ndetse atsinda 21 mu marushanwa yose.
Nubwo atari umwaka udasanzwe ku giti cye, yagize uruhare mu gufasha Arsenal gutwara igikombe cya shampiyona nyuma y’imyaka 22 itagitwara.
Ollie Watkins – Aston Villa
Uyu rutahizamu w’imyaka 30 ni we mukinnyi wa gatatu watsinze ibitego byinshi muri Premier League kuva yagera muri shampiyona nkuru mu 2020, aho imbere ye hari Haaland na Salah gusa.
Watkins amaze gutsinda ibitego 91 muri Premier League, bivuze ko ugereranyije atsinda ibitego birenga 15 buri shampiyona. Muri shampiyona ishize yatsinze ibitego 16.
Benjamin Šeško – Manchester United
Mu mwaka we wa mbere muri Premier League nyuma yo kuva muri RB Leipzig, uyu munya-Slovenia w’imyaka 23 yatsinze ibitego 11.
Igishimishije ni uko ibitego 9 muri ibyo 11 yatsinze nyuma y’uko Manchester United yirukanye Ruben Amorim ku wa 5 Mutarama, igasubira ku buryo bwo gukina butari bumwe n’ubwo Amorim yakoreshaga.
Ni ibitego bingahe bikunze gutwara Golden Boot?
Mu bihe 34 bya Premier League bimaze gukinwa, hamaze gutangwa Golden Boot 42, kubera ko hari imyaka imwe n’imwe abakinnyi barangije banganya ibitego.
Igitangaje ni uko muri abo begukanye Golden Boot, 12 gusa ari bo amakipe yabo yatwaye na Premier League muri uwo mwaka. Ibi bivuze ko umukinnyi ashobora kwegukana Golden Boot nubwo ikipe ye yaba idahanganiye igikombe cya shampiyona.
Mu myaka ya vuba aha, umubare w’ibitego ukenewe kugira ngo umukinnyi yegukane Golden Boot wariyongereye.
Hagati ya 2018/19 na 2021/22, nta mukinnyi wigeze arenga ibitego 23 mu gutsinda Golden Boot. Ariko mu bihe bine biheruka, abatsinze iki gihembo bagiye bafite hagati ya 27 na 36.
Abenshi mu begukana Golden Boot ni ba rutahizamu bakina hagati, ariko mu myaka ya vuba aha n’abakinnyi bakina ku mpande bagiye bakigarurira.
Cristiano Ronaldo ni we mukinnyi wa mbere ukina ku ruhande wegukanye Golden Boot, ubwo yayegukanaga muri 2007/08.
Mohamed Salah na Thierry Henry banganya rekodi yo kwegukana Golden Boot inshuro 4. Haaland akaba ashaka kugera kuri iyo ntera muri shampiyona ya 2026/27.
Abandi bakinnyi bakina ku mpande nka Sadio Mané na Son Heung-min na bo bamaze kwegukana iki gihembo cyangwa bakagisangiramo n’abandi.
Haaland yaba afite amahirwe angahe?
Nubwo hari abakinnyi benshi bashobora kumuhangara, Haaland aracyari umukandida ukomeye. Umubare w’ibitego amaze gutsinda muri Premier League, ubunararibonye afite n’ubushobozi bwo gutsinda ibitego byinshi bituma aba umukinnyi uzagora abazashaka kugerageza kumukura ku mwanya wa mbere.
Ariko Isak, Igor Thiago, Gyökeres, João Pedro, Watkins na Šeško bose bafite ubushobozi bwo kumwegera, cyane cyane niba bagize ibihe byiza kandi bakirinda imvune. Ikibazo gikomeye ni kimwe: ese Haaland azongera kugera ku bitego 27 cyangwa birenga, cyangwa undi mukinnyi azamucaho kuri Golden Boot muri iyi shampiyona?