Premier League 2026/27: Amasezerano 10 yatinze kwemezwa ku munsi wa nyuma w’isoko

Kubera akazi kenshi kari ku munsi wa nyuma w’isoko, hari amakipe yagejeje ku gihe inyandiko z’amasezerano (deal sheets), bituma ibikorwa byo gusinyisha abakinnyi bimwe byemezwa nyuma y’uko isoko ryari rimaze gufungwa.

Mu bakinnyi bagize ayo masezerano yatinze harimo Tosin Adarabioyo, Malick Fofana, Ben Chilwell, Jack Grealish, Jean-Matteo Bahoya, Dario Osorio, Ainsley Maitland-Niles, Femi Azeez, Chema Andres na Quentin Timber, nk’uko byatangajwe na GiveMeSport.

Tosin Adarabioyo yerekeje muri Tottenham

Umukinnyi ukina mu bwugarizi, Tosin Adarabioyo, yavuye muri Chelsea yerekeza muri Tottenham Hotspur ku mafaranga ashobora kugera kuri miliyoni 12 z’amapawundi.

Adarabioyo yahise yinjira muri Tottenham, aho azahanganira umwanya wo kubanza mu kibuga na Micky Van de Ven, Marcos Senesi ndetse na Jan Paul van Hecke.

Malick Fofana yerekeje muri Sunderland

Malick Fofana yavuye muri Lyon ajya muri Sunderland ku mafaranga agera kuri miliyoni 30.8 z’amapawundi.

Uyu mukinnyi w’Umubiligi yari yagizwe intandaro y’umwe mu biganiro byabaye urujijo ku munsi wa nyuma w’isoko, nyuma y’uko Sunderland yumvikanye na Lyon, Crystal Palace ikaza kwinjira mu biganiro ndetse ikagerageza kumwumvisha kujya i London.

Ben Chilwell yagarutse muri Crystal Palace

Ben Chilwell yavuye muri Strasbourg yerekeza muri Crystal Palace ku buntu. Crystal Palace iri mu makipe yakoze ibikorwa byinshi ku munsi wa nyuma w’isoko, maze yongera gusinyisha uyu wahoze ari umukinnyi wa Chelsea.

Chilwell, wari mu ikipe ya Crystal Palace yatwaye FA Cup, ubu azahatana na Tyrick Mitchell ku mwanya wo ku ruhande rw’ibumoso rw’ubwugarizi.

Jack Grealish yongeye gutizwa muri Everton

Jack Grealish yongeye kujya muri Everton avuye muri Manchester City mu ntizanyo y’umwaka umwe.

Umukinnyi w’Ikipe y’Igihugu y’u Bwongereza yari amaze igihe akinira Everton mu ntizanyo, ariko umwaka ushize ntiyabashije kurangiza neza kubera imvune yagize ku kirenge muri Mutarama.

Nubwo hari andi makipe yo muri Premier League yamwifuza, Grealish yahisemo kongera gukinira Everton.

Leeds United isinyisha Jean-Matteo Bahoya

Leeds United yihutiye gushaka Jean-Matteo Bahoya wa Eintracht Frankfurt ku munsi wa nyuma w’isoko, nyuma y’uko Wilfried Gnonto yerekeje muri Fiorentina.

Bahoya yageze muri Leeds mu ntizanyo izakurikirwa no kugurwa burundu, aho amafaranga yo kumugura burundu ashobora kugera kuri miliyoni 25 z’amapawundi mu mpeshyi itaha.

Dario Osorio yerekeje muri Crystal Palace

Crystal Palace yongeye gushaka kongera imbaraga mu busatirizi nyuma yo kubura Malick Fofana, maze isinyisha Dario Osorio wa FC Midtjylland.

Osorio yagiye muri Palace mu ntizanyo irimo ingingo yo kumugura burundu, aho amasezerano yose ashobora kugera kuri miliyoni 27.4 z’amapawundi.

Aya masezerano kandi yatumye Osorio aba umukinnyi waguzwe amafaranga menshi kurusha abandi mu mateka y’umupira w’amaguru wo muri Denmark.

Ainsley Maitland-Niles yerekeje muri Everton

Everton yasinyishije Ainsley Maitland-Niles avuye muri Lyon ku mafaranga agera kuri miliyoni 5 z’amapawundi.

Everton yari imaze igihe ishaka umukinnyi mushya ukina ku ruhande rw’iburyo rw’ubwugarizi, nyuma y’uko Seamus Coleman asoje amasezerano ye.

Maitland-Niles yahisemo kujya muri Everton kubera n’ubushobozi afite bwo gukina ku mpande zombi z’ubwugarizi ndetse no hagati mu kibuga.

Femi Azeez yerekeje muri Brighton

Brighton yageze ku bwumvikane na Millwall ku isinywa rya Femi Azeez, nyuma yo gukora ubusabe bwinshi bwari bwaranzwe no kwangwa. Uyu mukinnyi mpuzamahanga wa Nigeria yerekeje muri Brighton ku mafaranga y’ibanze agera kuri miliyoni 12.5 z’amapawundi.

Chema Andres yerekeje muri Brighton

Brighton kandi yasinyishije Chema Andres avuye muri VfB Stuttgart ku mafaranga agera kuri miliyoni 15.5 z’amapawundi. Uyu mukinnyi w’imyaka 21 ukina hagati mu kibuga mu buryo bwo kurinda yashimiwe cyane ndetse agereranywa na Rodri.

Yinjiye muri Brighton nk’umusimbura wa Carlos Baleba, aho azahatana kugira ngo abone umwanya mu ikipe y’umutoza Fabian Hurzeler.

Quentin Timber yerekeje muri Crystal Palace

Crystal Palace yasinyishije Quentin Timber avuye muri Marseille ku mafaranga agera kuri miliyoni 17 z’amapawundi.

Palace yari imaze igihe ishaka kongera imbaraga mu kibuga hagati, maze ku munsi wa nyuma w’isoko ibasha kubona uyu mukinnyi wari umaze igihe uri ku rutonde rw’abo yifuza.

Timber, akaba ari murumuna wa Jurrien Timber ukinira Arsenal, yavuye muri Marseille nyuma y’uko iyi kipe yo mu Bufaransa yashakaga kubona amafaranga mbere y’uko isoko rifungwa.

Nubwo isoko ry’abakinnyi muri Premier League ryari ryafunzwe ku isaha ya saa 23:00, amasezerano yari yatanzweho inyandiko ku gihe yakomeje kwemezwa nyuma y’iyo saha. Ibi byatumye amakipe nka Tottenham, Everton, Brighton, Leeds United na Crystal Palace akomeza gutangaza abakinnyi bashya mu masaha yakurikiyeho.