Polisi y’u Rwanda yatangije ubukangurambaga bwo gukumira inkongi mu turere twose tw'igihugu

Ni ubukangurambaga bwatangiranye n’Ugushyingo 2026, bukazakomereza mu turere twose tw'igihugu, bukorerwa mu bigo bitandukanye no mu bice bikunze guhuriramo abantu benshi.

Mu bazahugurwa harimo abakorera mu mahoteli, amasoko, udukiriro, inyubako nini zifite ibice bitandukanye, inzego z'umutekano, ibigo byigenga bitanga serivisi z'umutekano ndetse n'abakora irondo ry'umwuga.

Nk’uko byatangajwe na Polisi y’u Rwanda, Umuyobozi w'Ishami rya Polisi y'u Rwanda rishinzwe kuzimya inkongi n'ubutabazi, Assistant Commissioner of Police (ACP) Paul Gatambira, yavuze ko intego ari ukugira abantu benshi bafite ubumenyi bwo gukumira inkongi no gutanga ubutabazi bw'ibanze hifashishijwe ibikoresho biboneka aho ikibazo cyabereye.

Yagize ati: “Turashaka kwagura imikoranire n'ibyiciro bitandukanye kugira ngo dufatanye kujya turwanya inkongi z'umuriro kuko ahenshi hafashwe n'inkongi usanga hari igihe amakuru atugeraho atinze, nyamara tubaye dufite abantu bari aho hafi bigishijwe gukoresha ibizimyamuriro n'ibindi bikoresho byifashishwa mu kuzimya, twakabaye tuhagera hari ibyo bakoze by'ibanze.”

Yakomeje avuga ko kurwanya inkongi bidakwiye kuba inshingano za Polisi yonyine, ahubwo n'abaturage bakwiye kubigiramo uruhare. Ati: “Ntabwo dushaka ko biba ibya Polisi gusa, turashaka ko n'abaturage babigiramo uruhare kuko abenshi iyo umuriro bawubonye baba ba Ntibindeba, ugasanga barimo kwiruka.”

Yasobanuye ko bahugura abaturage kugira ngo aho kubona inkongi bagahita bahunga gusa, bajye bamenya uko batanga ubutabazi bw'ibanze mu buryo butekanye, bakoresheje ibikoresho bihari.

ACP Gatambira yavuze ko mu mahugurwa batanga banasobanurira abantu ibishobora guteza inkongi, kugira ngo bamenye uko babyirinda. By'umwihariko, abakora imirimo yo gusudira basabwa kujya bagira ikizimyamuriro hafi yabo kugira ngo bashobore kugikoresha igihe habaye ikibazo.

Yagize ati: “Bikunze kugaragara ko ibikorwa bya muntu ari byo bikunze kuba intandaro y'inkongi y'umuriro, ni yo mpamvu tubasaba kwirinda igikorwa cyose bashobora gukora mu gihe nta bwirinzi bafite kikaba cyateza inkongi.”

Ibyo Polisi isaba abubaka amazu n'abayacunga

Polisi yasabye abubaka amazu y'ubucuruzi, amahoteli, amasoko, udukiriro n'izindi nyubako zakira abantu benshi kujya bazirikana ingamba zo gukumira inkongi kuva mu gihe cyo kubaka.

Muri izo ngamba harimo gushyiramo uburyo bworohereza kubona amazi akoreshwa mu kuzimya inkongi, ibitembo by'amazi n'ibigega biyabika kugira ngo ubutabazi butazatinda kubera gushaka amazi kure.

Abafite izo nyubako basabwe kandi kujya bagenzura ibizimyamuriro kugira ngo barebe ko bitarengeje igihe cyo gukoreshwa kandi ko biri ahantu byoroshye kugera.

Hari kandi inama yo gushyiraho inzira z'ubuhungiro zifasha abantu gusohoka mu nyubako mu gihe habaye inkongi, gushyiramo ibyuma bitanga impuruza igihe habaye ikibazo mu miyoboro y'amashanyarazi no gukoresha insinga zujuje ubuziranenge.

ACP Gatambira yasoje asaba abaturage kujya batanga amakuru ku gihe igihe babonye ibikorwa bishobora guteza inkongi, bagafatanya na Polisi mu kuzikumira aho gutegereza ko ikibazo kiba.

Yashimangiye ko kurwanya inkongi ari inshingano ya buri wese, bityo abaturage bakwiye kumva ko bafite uruhare mu kurinda ubuzima bw'abantu, imitungo n'ibikorwa by'iterambere.