Aba banyeshuri bari bitabiriye Ihuriro Nyafurika ry'iminsi 12 ry'ubukangurambaga ku guhanga udushya (Pan-African Innovation Bootcamp), riri kubera mu kigo cya Ntare Louisenlund giherereye mu Karere ka Bugesera.
Iri huriro ritegurwa n'Ikigo cya Coderina EdTech, gifasha urubyiruko guteza imbere ubumenyi mu ikoranabuhanga, guhanga udushya no gusobanukirwa amateka y'umugabane wa Afurika.
Nk'uko byatangajwe na polisi y'u Rwanda, mu ruzinduko rwabo kuri uyu wa Gatanu, tariki ya 10 Nyakanga, bakiriwe na Komiseri ushinzwe Inozabubanyi n'Itangazamakuru muri Polisi y'u Rwanda akaba n'Umuvugizi wa Polisi, Assistant Commissioner of Police (ACP) Boniface Rutikanga, wabakiriye mu izina ry'ubuyobozi bukuru bwa Polisi y'u Rwanda.
Mu gihe cy'uruzinduko, aba banyeshuri beretswe imikorere y'amashami atandukanye ya Polisi y'u Rwanda, by'umwihariko Ishami rishinzwe kuzimya inkongi z'umuriro n'ubutabazi ndetse n'Ishami rishinzwe umutekano wo mu muhanda. Banasobanuriwe uko ayo mashami akoresha ikoranabuhanga mu gutanga serivisi zinoze no kurushaho kurinda umutekano w'abaturage.
ACP Rutikanga yashimiye aba banyeshuri kuba barahisemo gusura u Rwanda na Polisi yarwo, abasobanurira ko umutekano igihugu gifite ushingiye ku buyobozi bwiza n'uruhare rugaragara rw'abaturage.
Yagize ati: "Kugeza ubu mu Rwanda umutekano ntugicungwa n'inzego ziwushinzwe n'abandi bafatanyabikorwa gusa, ahubwo n'abaturage basobanukiwe ko umutekano ari wo shingiro rya byose. Ni yo mpamvu batanga amakuru ku gihe kugira ngo ibyaha bikumirwe bitaraba. Kuba dufite umutekano ugaragarira buri wese, tubikesha ubuyobozi bwiza bufite icyerekezo cy'imirongo ihamye."
Yakomeje avuga ko Polisi y'u Rwanda yakomeje kwimakaza ikoreshwa ry'ikoranabuhanga muri serivisi zitandukanye zirimo gucunga umutekano wo mu muhanda, gutanga no gukoresha impushya zo gutwara ibinyabiziga, kugenzura ubuziranenge bwabyo ndetse no koroshya uburyo abaturage bahabwa serivisi no gukorana na bo mu bikorwa byo kubungabunga umutekano.
Umuyobozi wa Coderina EdTech mu Rwanda, Ndekezi Ange Gabriella, yashimiye Polisi y'u Rwanda ku buryo yakiriye neza iri tsinda ndetse n'ibiganiro byafashije abanyeshuri kurushaho gusobanukirwa uruhare rw'umutekano mu iterambere ry'igihugu.
Yavuze ko igitekerezo cyo gutegura iri huriro cyaturutse ku cyifuzo cyo gufasha urubyiruko rw'Afurika kutamenya gusa ikoranabuhanga no guhanga udushya, ahubwo no gusobanukirwa amateka y'ibihugu byayo ndetse n'agaciro k'ubumwe bw'Abanyafurika.
Ati: "Twabonye ko bidashoboka gutegura abayobozi beza b'ejo hazaza batabanje gusobanukirwa amateka y'ibihugu byabo. Ni yo mpamvu twahuje abanyeshuri baturutse mu bihugu bitandukanye bakaza mu Rwanda kugira ngo bige ku rugendo rw'igihugu mu kwiyubaka, banasangizanye ubumenyi n'ubunararibonye."
Biteganyijwe ko aba banyeshuri bazakomeza gusura ahantu hatandukanye mu Rwanda hagaragaza amateka y'igihugu, urugendo rwo kwiyubaka nyuma ya Jenoside yakorewe Abatutsi mu 1994, ndetse n'iterambere mu guhanga udushya, ikoranabuhanga n'ubuyobozi bugamije iterambere rirambye.
