Ni mu butumwa bwatangiwe ku cyicaro cy’Ishami rya Polisi rishinzwe gusuzuma ubuziranenge bw’Ibinyabiziga (AI), kuri uyu wa Gatandatu tariki ya 15 Ugushyingo, mu murenge wa Ndera, akarere ka Gasabo, ahakorera ikigo gishya gisuzuma ubuziranenge bw’ibinyabiziga ndetse n’imyotsi ihumanya ikirere.
Umuvugizi wa Polisi y’u Rwanda, Assistant Commissioner of Police (ACP) Boniface Rutikanga yavuze ko iki kigo kije kunganira ibindi bigo bisanzwe mu rwego rwo kwirinda umuvundo no kwihutisha serivisi.
Yagize ati: "Iki kigo cyubatse muri uyu murenge wa Ndera gifunguye amarembo ku bantu bose bashaka gukoresha isuzuma ry’ibinyabiziga no gusuzuma imyuka ihumanya ikirere. Kizajya gipima by’umwihariko ibinyabiziga birimo amakamyo yikorera imizigo kuva kuri toni 3.5 kuzamura, moto ku myotsi ndetse n’ibindi binyabiziga.”
Yakomeje ati: “Iki kigo gitangiye gifite ubushobozi bwo kwakira imodoka 450 na moto 200 ku munsi, kije kunganira ibindi bisanzwe mu rwego rwo kugabanya umuvundo w’ibinyabiziga byahuriraga mu kigo cya Remera, kwihutisha serivisi ndetse no gupima imyotsi kuri moto, bikorwa mu masegonda 60 gusa. Turasaba abafite amapipiki kugana iki kigo ari benshi kugira ngo bagire uruhare mu kurwanya imyotsi ihumanya ikirere."
ACP Rutikanga kandi yibukije abafite ibinyabiziga kuzirikana kujyanisha gupimisha imyotsi na gahunda isanzwe yo gupimisha ubuziranenge kugira ngo bikorerwe umunsi umwe, kandi ko gupimisha ikinyabiziga atari amahitamo yabo gusa ahubwo ko biteganywa n’itegeko, bityo utazabyubahiriza azabihanirwa.
Umuyobozi wa gahunda yo kugenzura imyotsi ihumanya ikirere (REIP) mu kigo cy’igihugu cyo kubungabunga ibidukikije (REMA), Eng. Mbonigaba Innocent yavuze ko umwotsi uhumanya ikirere utangiza utwaye ikinyabiziga gusa, asaba abafite ibinyabiziga gufata iya mbere mu kwihatira kubungabunga umwuka duhumeka.
Yagize ati: “Mu binyabiziga bisaga gato 12,400 byakorewe isuzuma ry’imyuka bivubura kuva mu mpera za Kanama, ibyatsinzwe isuzuma biri ku kigereranyo cya 20%. Turifuza ko bimanuka kugera kuri 0, niyo mpamvu dukomeza gukangurira ba nyir’ibinyabiziga kubifata neza no gukosora ibituma bisohora umwuka wangiza, basimbuza ku gihe ibigomba gusimbuzwa. “
Tubarimo Alphonse, umwe mu bakora akazi ko gutwara abagenzi kuri moto arishimira kuba yahawe icyemezo cy’ubuziranenge bwa moto ye, nyuma yo gutsinda isuzuma.
Yagize ati: “Maze imyaka 16 nkora akazi ko gutwara abagenzi kuri moto mu Mujyi wa Kigali. Ni ishema kuba moto yanjye maranye imyaka 5, ari yo isuzumwe mbere y’izindi zose ku nshuro ya mbere muri iyi gahunda yo gusuzuma amapikipiki imyotsi ihumanya ikirere, nkaba mpawe n’icyemezo cy’ubuziranenge.”
Kuri Tubarimo yumva neza akamaro ko kurwanya imyotsi ihumanya ikirere, ayigereranya n’amapoto yo ku muhanda ngo iyo ayitegereje abona yarahindutse umukara mu gihe aba yarashinzwe ari umweru, biturutse ku byotsi bivuburwa n’ibinyabiziga biyanyura iruhande, akayasanisha n’ibihaha by’umuntu uyihumeka, aboneraho gushishikariza bagenzi be kwitabira iyi gahunda.
Uretse Imashini yimurwa yifashishwa mu gusuzuma ubuziranenge bw'ibinyabiziga, iki kigo gikorera mu murenge wa Ndera kije cyiyongera ku bindi bigo bine (4) bisanzweho, byashyiriweho gusuzuma ubuziranenge bw'ibinyabiziga brimo; igiherereye i Remera mu Mujyi wa Kigali, Rwamagana, Huye no mu Karere ka Musanze byose byatangije na gahunda yo gupima n’amapikipiki ku bijyanye n’imyotsi yangiza ikirere.
