Pochettino yavuze ko Tottenham ikwiye guhabwa igikombe Chelsea yatwaye mu 2016/17

Chelsea yaciwe amande ya miliyoni 10.75 z’amapawundi muri Werurwe 2026, nyuma yo guhamwa n’ibyaha bijyanye no kutubahiriza amategeko y’irushanwa mu bikorwa byabaye mu myaka yashize.

Muri icyo gihe kandi, igihano cyo gukurwaho amanota atandatu cyari cyarashyizwe ku ruhande nyuma y’ubujurire. Chelsea yatozwaga na Antonio Conte muri shampiyona ya 2016/17, irangiza iri ku mwanya wa mbere, irusha Tottenham ya Pochettino amanota arindwi.

Ba nyiri Chelsea, Todd Boehly na Clearlake Capital, batangaje ubwabo amakosa 74 yari yarakozwe mu kurenga ku mategeko y’Ishyirahamwe ry’Umupira w’Amaguru mu Bwongereza (FA), ubwo baguraga iyi kipe mu 2022.

Chelsea yemeye ko hagati ya 2011 na 2018 yakoze ubwishyu bwa miliyoni 47 z’amapawundi mu ibanga, bujyanye n’abakozi b’abakinnyi batanditswe ndetse n’abandi bantu bagiraga uruhare mu isinywa ry’abakinnyi.

Pochettino, watoje Tottenham kuva mu 2014 kugeza mu 2019, yavuze ko ikipe ye yari ikwiye kuba yarahawe igikombe cya shampiyona.

Ati: “Twari dukwiye gutwara igikombe kimwe cya Premier League. Twari dukwiye kugihabwa. Chelsea yarahanwe kandi yemeye ko yarenze ku mategeko, none se igikombe nticyari gikwiye guhabwa ikipe yari ku mwanya wa kabiri?”

Uyu mutoza ukomoka muri Argentine yakomeje avuga ko Tottenham itigeze ihatana na Chelsea mu buryo bungana, kuko amakipe yombi atari yarakoresheje amategeko amwe mbere y’uko shampiyona itangira.

Ati: “Ni ukuri ko tutahatanye dukurikiza amategeko amwe. Birumvikana rwose kuvuga ko tutatangiye shampiyona dufite amahirwe angana.”

Pochettino yayoboye Tottenham mu gihe cy’imyaka itanu, ndetse ayigeza ku mukino wa nyuma wa UEFA Champions League mu 2019. Icyakora, nta gikombe yegukanye muri iyo kipe, aho umwanya wa kabiri muri Premier League wa 2016/17 ari wo mwanya mwiza yagezeho muri shampiyona.

Yongeyeho ati: “Ahari iyo dukurikiza amategeko amwe, natwe twari kugura bamwe mu bakinnyi bari gutuma ikipe irushaho gukomera cyangwa igatsinda ibitego byinshi.”

Pochettino, waje no gutoza Chelsea muri shampiyona ya 2023/24, yavuze ko ibyo atari ukubura uko yisobanura, ahubwo ko ari ukuri kwe ku byabaye.

Ati: “Ntabwo ndimo kwitotomba, ni ukuri. Niba barabyemeye ko barenze ku mategeko, igikombe cya Premier League cyari gikwiye guhabwa ikipe yari ku mwanya wa kabiri.”

Yavuze kandi ko adatinya kuvuga uko abibona, nubwo byababaza abafana ba Chelsea.

Ati: “Ntabwo ntinya kuvuga ukuri. Abafana ba Chelsea bashobora kubabazwa n’ibyo ndi kuvuga, ariko iyo tuba turi Tottenham tukarenga ku mategeko, nanjye nari kubyemera gutyo.”

Chelsea yakoze iki?

Nyuma yo gutanga amakuru ku makosa ashobora kuba yarakozwe, Chelsea yavuze ko iki kibazo yagifashe nk’igikomeye cyane kandi ko yakoranye neza n’inzego zose zari zibishinzwe iperereza.

Nk’uko tubikesha BBC Sport, iperereza ryakozwe na Premier League ryagaragaje ko hari ubwishyu bwakozwe n’abandi bantu bari bafitanye isano na Chelsea, bukagezwa ku bakinnyi, abakozi b’abakinnyi batanditswe ndetse n’abandi bantu, ariko ubwo bwishyu ntibwatangazwa ku nzego zishinzwe kugenzura amakipe.

Raporo ya Premier League yagaragaje ko ubwo bwishyu bwari bufitanye isano n’ibikorwa byo kugura abakinnyi byakozwe hagati ya 2011 na 2018. Muri abo bakinnyi harimo Eden Hazard, Samuel Eto’o, Willian, Ramires, David Luiz, André Schürrle na Nemanja Matić.

Icyakora, nta kimenyetso cyatanzwe kigaragaza ko abo bakinnyi ubwabo bakoze amakosa. Hazard, Willian, Matić na David Luiz bose bari mu bakinnyi ba Chelsea mu mwaka w’imikino wa 2016/17.

Premier League yongeye gusuzuma uko Chelsea yari yaratangaje imari yayo mu myaka yashize, ikongeramo amafaranga yari yarishyuwe ariko ataratangajwe. Nyuma y’iryo suzuma, yasanze iyo ayo mafaranga aza gutangazwa ku gihe, Chelsea itari kuba yararenze ku mategeko agenga imikoreshereze y’amafaranga n’iterambere rirambye ry’amakipe.

Kubera iyo mpamvu, Premier League yavuze ko gukuraho amanota atari igihano gikwiye kuri Chelsea.

Amande ya mbere yari miliyoni 20 z’amapawundi, ariko agabanywa 50%, aba miliyoni 10 z’amapawundi, kubera ko Chelsea ari yo yari yatanze amakuru ku makosa yayo kandi ikagira uruhare rufatika mu iperereza.

Andi mande ya 750,000 by’amapawundi yatanzwe muri Werurwe yari ajyanye no kwandikisha abakinnyi b’amakipe y’abato hagati ya 2019 na 2022. Chelsea yanahawe igihano cyo kumara amezi icyenda idashobora kwandikisha abakinnyi bashya mu makipe yayo y’abato.