Impungenge zihari zirajyana n'uko mbere y'uko shampiyona isubikwa mu ntangiriro z'uku kwezi kubera imikino ya FIFA, hari hamaze iminsi havugwa uburiganya muri shampiyona y'uyu mwaka, ndetse bimwe na bimwe bikagira ibimenyetso bigaragarira amaso y'abawukurikiranira hafi.
Mu minsi ibiri isoza Shampiyona, APR FC na SC Kiyovu bari mu rugamba rwo guhanganira igikombe, mu gihe Rayon Sports, Mukura VS&L, AS Kigali na Police FC bo bahataniye gusoreza mu myanya ine ya mbere naho Bugesera FC, Etincelles FC, Etoile de l'est, Gorilla FC na Rutsiro FC bo bakaba bahatanira kutava muri shampiyona y'icyiciro cya mbere.
Uko imikino y'umunsi wa 29 iteganijwe:
- Tariki 13 Kamena:
- Musanze FC v Mukura VS&L
- Etoile de l'est v Gorilla FC
- Gicumbi FC v Rutsiro FC
- APR FC v AS Kigali
- Bugesera FC v POLICE FC
- Marine FC v Rayon Sports
- Espoir FC v SC Kiyovu
- Tariki 14 Kamena
- Etincelles v Gasogi United
Ubukene mu biteye impungenge:
Amakipe ya SC Kiyovu ihataniye igikombe na Rutsiro FC iharanira kuguma mu cyiciro cya mbere ahuriye ku mpungenge z'umusaruro muke ushobora kuboneka, biturutse ku kuba abakinnyi bayo batanezerewe kubera amafaranga y'ibirarane baberewemo.
Ku ruhande rwa Rutsiro FC, hagati mu cyumweru gishize abakinnyi bahagaritseho imyitozo kubwo kuba bafite impungenge z'uko mu gihe ikipe yabo yasoza shampiyona y'uyu mwaka itabahaye imishahara y'amezi abiri aheruka batarishyurwa, bashobora kuzayabona kera cyane.
Abakinnyi ba Rutsiro FC baheruka kwishima kera
Ubuyobozi bwa Rutsiro FC bwafatanyije n'ubuyobozi bwite bw'akarere, babasha guha abakinnyi amafaranga macye macye ngo basubukure imyitozo banitegura umukino bafitanye na Gicumbi FC, ariko hari impungenge zo gutakaza umukino kuko abakinnyi ubwabo batanyuzwe n'amafaranga make bahawe, nk'uko amakuru InyaRwanda ifite abyemeza.
Ku ruhande rwa Kiyovu Sports naho ntibitandukanye cyane n'ibiri i Rutsiro, kuko abakinnyi ba SC Kiyovu ntibakoze imyitozo y'iminsi ibiri iheruka ndetse banabanje kwanga kujya gukina na Espoir FC kugeza ubwo bahendahenzwe, bakajya i Rusizi habura amasaha 23 gusa ngo amasaha y'umukino bafitanye na Espoir FC agere.
Iyi kipe irushwa na APR FC amanota abiri gusa, irakina na Espoir FC ifite umananiro w'urugendo rurerure uhurirana n'uko abakinnyi bayo bamaze amasaha ayinga 72 badahuriye mu kibuga, byose biteye impungenge abakunzi bayo.
Etoile de l'est yikanze gusifurirwa nabi:
Amakuru aturuka i Ngoma InyaRwanda ifite, avuga ko Etoile de L'est icyumva ko izasifurirwa na Dushimimana Eric, Safari Hamiss ndetse na Ayubusa Pacifique, yabyinubiye ivuga ko aba basifuzi basanzwe bafitanye umubano wihariye n'abayobora Gorilla FC, bituma umukino uhuza aya makipe yombi uhabwa Rulisa Patience ngo awuyobore.
Ku rutonde rwa Shampiyona, Gorilla Fc iri ku mwanya wa 13 n'amanota 29 igakurikirwa na Etoile de L'est ifite 27, mu gihe Rutsiro ifite amanota 26 hagaheruka Gicumbi FC yamaze kwizera kumanuka mu cyiciro cya kabiri.
Etoile de L'est iri mu bwoba
Kugurisha umukino byikanzwe muri Espoir FC:
Amakuru yizewe ava i Rusizi, arahamya ko bamwe mu bakozi ba Espoir FC badahuza n'umutoza wayo Gatera Musa ku byerekeranye no korohereza umukino ikipe ya SC Kiyovu Sports bari bucakirane, iri kurwanira igikombe cya shampiyona iheruka mu myaka 28 ishize.
Umwe mu bo muri Espoir FC waganiriye na InyaRwanda yavuze ko habayeho igitekerezo cyo guha SC Kiyovu amanota 3, ariko kidahuriweho na bose kuko umutoza Gatera Musa adashaka gutakaza imikino ibiri ya shampiyona isigaye.
Umutoza Gatera Musa yamaze gusinyira kuzatoza Gorila FC mu myaka ibiri iri imbere, byumvikana nk'aho adashobora gutuma Espoir FC itsinda Gorilla FC ku mukino wa nyuma wa shampiyona, kuko Gorilla FC iri mu makipe ahatanira kutajya mu cyiciro cya kabiri.
Ku rundi ruhande, amakuru avuga ko ubuyobozi bwa Espoir buteganya ko Gatera Musa atazagira uruhare mu mukino wa nyuma bazakinamo na Gorilla FC, kugira ngo itazoroherwa no kubona intsinzi nk'uko byagenze mu mukino ubanza wabereye i Rusizi, Gorilla FC igatsinda Espoir FC ibitego 2-0.
Gatera Musa, umwe mu bahanga ba Shampiyona y'u Rwanda
Kugurisha imikino no gusifurirwa nabi nkana ni ibibazo bimaze igihe kitari gito bivugwa muri ruhago y' u Rwanda, ndetse bamwe na bamwe mu bawukunda basaba ko inzego za Leta zabimburirwa n'urw'ubugenzacyaha, bagacungira hafi iby'igiturire gituma havugwa ko bamwe batsinda batabikoreye abandi bagatsindwa barenganijwe.