Rayon Sports WFC niyo yegukanye igikombe cya shampiyona y’u Rwanda mu bagore. Ku cyumweru ni bwo yagishikirijwe nyuma y’uko yari yakinnye na Bugesera WFC ariko ibizi neza ko yamaze kuzuza amanota ayemerera gutwara igikombe.
Ni Rayon Sports WFC yari imaze igihe kinini itaka inzara nyuma y’uko bari bamaze amezi atatu badahembwa ndetse babigeza mu buyobozi bw’ikipe bukabumvira mu gutwi kumwe bigasohokera mu kundi gutwi.
Kuri uyu wa Mbere ubwo Perezida wa Rayon Sports Twagirayezu Thadee yahuraga n’aba bakinnyi yabashimiye ku kuba barabashije gutwara igikombe cya shampiyona kandi basaza babo bica amarenga ko bo bashobora kugitakaza ndetse abasaba kuzatwara igikombe cya CECAFA.
Twagirayezu Thadee yagize ati “ Umuntu utishimye n’amanike akaboko hejuru. Kuba mutishimye, ndabizi ko mwishimye ahubwo hari akantu wumva ukeneye ku ruhande. Nibyo tugiye kuganiraho gatoya. Abadafite amasezerano nabo bazajya baganira n’abandi kuri Telephone barebe uko bakongera amasezerano ariko ndifuza ko CECAFA Muramutse muyitwaye mwaba mubaye aba kabiri mu Rwanda. Mumenye ko muri abagabo. Igikombe cya shampiyona abahungu cyarabananiye none nimwe mugitwaye. Yego cyatunaniye."
Kuva Rayon Sports WFC yashingwa mu bikombe byose byakiniwe mu Rwanda byose yarakumbakumbye uretse igikombe cy'Amahoro cya 2025 yagitakaje nyuma yo gutsindwa na Indahangarwa ibitego 4-2 ku mukino wa nyuma. Gutwara igikombe cya shampiyona biyiha amahirwe yo kuzahagararira u Rwanda mu marushanwa ya CECAFA.
Rayon Sports WFC niyo yegukanye igikombe cya shampiyona ya 2024-25
Perezida wa Rayon Sports yasabye Rayon Sports WFC gutwara igikombe cya CECAFA