Ni amatora ya mbere Perezida Samia w’imyaka 65 yari yitabiriye nk’umukandida mukuru kuva yasimbura nyakwigendera John Pombe Magufuli mu mwaka wa 2021.
Komisiyo y’Amatora yavuze ko Samia yabonye amajwi arenga miliyoni 31,9 bingana na 97,66% by’abatoye bose. Ubwitabire muri aya matora bwari kuri 87% mu gihe abiyandikishije ku gutora bari miliyoni 37,6.
Nubwo yatsinze amatora, ni amatora yari arimo ibibazo bitandukanye dore ko abatavuga rumwe na Leta bavuze ko abayobozi babo bafunzwe, abandi ntibemererwe kwiyamamaza, bigatuma ataba mu bwisanzure.
Nyuma y’itangazwa ry’ibyavuye mu matora, imyigaragambyo yabaye myinshi mu mijyi nka Dar es Salaam, Arusha na Dodoma, aho abaturage benshi bavugaga ko amatora atabaye mu mucyo.
Amashusho n’amakuru yagiye agaragara ku mbuga nkoranyambaga, yagaragazaga abapolisi bari kurasa ibyuka biryana mu maso.
Ishyaka rikomeye ritavuga rumwe na Leta, CHADEMA, ryatangaje ko abantu basaga 700 bishwe cyangwa baburiwe irengero, mu gihe inzego za Leta zavuze ko abapfuye ari bake cyane.
Imiryango mpuzamahanga irimo Umuryango w’Abibumbye (ONU) n’amashyirahamwe y’uburenganzira bwa muntu yasabye ko hakorwa iperereza ryigenga kugira ngo hamenyekane ukuri ku byabaye.
Leta ya Tanzania yashyizeho amasaha ya 'Guma mu rugo' mu bice bimwe na bimwe by’igihugu, ndetse ibuza imikoreshereze ya interineti, ivuga ko ari ukugira ngo habeho ituze.
Samia Suluhu Hassan yatsinze amatora ya Perezida muri Tanzania
Amatora ya Perezida wa Tanzania yakurikiwe n'imyigaragambyo ikomeye, birangiye yegukanywe na Samia Suluhu Hassan