Kuri uyu wa Gatatu tariki ya 06 Gicurasi 2026 saa Tatu z’ijoro kuri Allianz Arena ni bwo FC Bayern Munich yari yakiriye Paris Saint-Germain mu mukino wo kwishyura wa 1/2 cya UEFA Champions League.
Uyu mukino warangiye amakipe yombi anganya 1-1 ariko PSG ihita ikomeza igera ku mukino wa nyuma bitewe n’uko ku mukino ubanza yari yatsinze 5-4.
Nyuma y’uyu mukino Perezida Kagame abinyujije kuri X yashimiye PSG yo mu Bufaransa isanzwe yamamaza Visit Rwanda. Yanditse ati:”Ndashimira umufatanyabikorwa wa Visit Rwanda, Paris Saint-Germain wageze ku mukino wa nyuma wa UEFA Champions League nyuma yo kwitwara neza.”
Perezida Kagame yifurije amahirwe masa PSG ndetse na Arsenal zizahurira ku mukino wa nyuma ndetse yerekana ko hitezwe finali ikomeye hagati y’aya makipe yombi. Aya makipe yose ahuriye ku kwamamaza Ubukerarugendo bw’u Rwanda.
PSG ifite igikombe giheruka izakina na Arsenal ku mukino wa nyuma wa UEFA Champions League 2025/2026 utegerejwe tariki ya 30 Gicurasi 2026 kuri Puskas Arena i Budapest muri Hungary.
PSG imaze gutwara Champions League inshuro imwe, mu gihe Arsenal nta na rimwe iregukana iki gikombe, icyakora yigeze kugera kuri Final inshuro imwe, hakaba hashize imyaka 20 yanditse ayo mateka.
Perezida Kagame yashimiye PSG yageze ku mukino wa nyuma wa Champions League, yo na Arsenal azifuriza amahirwe
Perezida Kagame yashimiye ikipe ya Paris Saint-Germain yageze ku mukino wa nyuma wa UEFA Champions League