Ni mu butumwa Umukuru w’Igihugu yanyujije ku rubuga rwa X kuri uyu wa Kabiri nyuma y’iminota micye Arsenal igeze kuri aya mateka.
Yanditse ati: "Turashimira Arsenal, umufatanyabikorwa wacu wa VisitRwanda, kuba ari we watwaye igikombe cya Premier League nyuma y'umwaka w'imikino ukomeye”.
Arsenal yegukanye igikombe cya shampiyona y’u Bwongereza cya 2025/2026 nyuma y’uko AFC Bournemouth inganyije na Manchester City igitego 1-1.
Ni igitego cya Eli Junior Kroupi ahawe umupira na Adrien Truffert ku munota wa 39 naho Erling Haaland yishyura ku munota wa 90+5.
Ibi byahise bituma n'iyo Arsenal yazatsindwa umukino wo ku munsi wa nyuma n’ubundi yasoreza ku mwanya wa mbere.
Kuri ubu Arsenal iri ku mwanya wa mbere n’amanota 82 ikaba irusha Manchester City iyikurikiye amanota ane mu gihe habura umikino umwe ngo shampiyona irangire.
Arsenal itozwa na Mikel Arteta yaherukaga igikombe cya shampiyona muri 2004. Muri rusange yahise igira ibikombe 14 bya Premier League mu mateka.
Perezida Kagame ni umufana wa Arsenal kuva mu 1996, aho avuga ko ayikundira umukino mwiza ikina yatsinda cyangwa igatsindwa.
Mu 2007 ubwo Perezida Kagame yizihizaga isabukuru y’imyaka 50 y’amavuko, umutoza Arsene Wenger [watozaga Arsenal] yamuhaye impano y’idarapo ry’iyi kipe ririho imikono y’abakinnyi bose mu kumushimira.
Ntabwo ari ibi gusa kuko n'ikipe ya Arsenal muri 2014 yamugeneye impano ayishyikirizwa na Tony Adams wahoze ari kapiteni wayo.
Tony Adams yatangaje ko iyi kipe yamugeneye umupira wo gukina wa Arsenal, imuha imipira itatu yo kwambara ya Arsenal hariho umwe uriho amazina ye na numero imwe.
Arsenal ifitanye umubano n’u Rwanda kuko kuva muri Gicurasi 2018 Ikigo cy’Igihugu cy’Iterambere (RDB) cyinjiye mu bufatanye bw’imyaka itatu n’iyi kipe ya Arsenal FC yo muri Premier League.
U Rwanda rwabereye Arsenal umuterankunga wa mbere ku maboko y’imipira, aho yambara ‘Visit Rwanda’ ku kuboko kw’ibumoso ku ikipe nkuru, iy’abatarengeje imyaka 23 no mu ikipe y’abagore. Aya masezerano azarangirana n’uyu mwaka w’imikino.
Perezida Kagame yashimiye Arsenal yegukanye igikombe cya Premier League nyuma y’imyaka 22
Arsenal yaherukaga igikombe cya shampiyona mu myaka 22 ishize