Operation “Dead Hand”: Perezida Putin yubatse indake nini mu ibanga mu misozi ya Ural

Iyi nyubako iri ahitwa Installation 1335, hafi y’umudugudu muto wa Kytlym, ku birenge by’umusozi wa Kosvinski Kamen, mu misozi ya Ural.

Aka gace kari kure cyane y’ahantu hatuwe, kagizwe ahanini n’amashyamba manini y’ibiti by’imishishi. Kuba hari ikigo cya gisirikare kirinzwe cyane ku mpande z’umusozi rero bitera kwibaza ku mpamvu yacyo.

Umuyoboro munini w’inzira zo munsi y’ubutaka

7 sur 7 ducyesha iyi nkuru, itangaza ko munsi y’uwo musozi w’Ural hari urusobe runini rw’inzira zo munsi y’ubutaka rwubatswe kuva mu gihe cy’Intambara y’Ubutita.

Icyo gihe, u Burusiya bwari bwarateguye uburyo bwo kwihorera mu gihe bwaba buteweho igitero cya kirimbuzi. Intego yari ugutuma igihugu cyaba cyagabye igitero gihura n’ingaruka zikomeye.

Muri icyo gihe, hubatswe indake hirya no hino mu gihugu, zishobora gukingira abantu n’ibikoresho by’ingenzi mu gihe habaye igitero cya kirimbuzi, ndetse zigafasha ubuyobozi gukomeza itumanaho n’abasirikare no gutegura igisubizo.

Iyi gahunda yahawe izina rya “Perimetr”, mu bihugu by’iburengerazuba ikaba yaramenyekanye cyane nka “Dead Hand”.

Nyuma y’Intambara y’Ubutita, byari bimenyerewe gutekereza ko iyi gahunda yari yarasigaye idakoreshwa cyane.

Gahunda yongeye kugira ubuzima

Icyakora, ubushakashatsi bushya bwerekana ko iyi gahunda yaba yarasubukuwe mu ibanga mu gihe cy’ubutegetsi bwa Vladimir Poutine.

Ibi byagaragajwe n’iperereza ryakozwe na Dossier Center, ikigo cy’ubushakashatsi kiyoborwa n’umunyapolitiki utavuga rumwe n’ubutegetsi bw’u Burusiya, Mikhail Khodorkovsky, ku bufatanye n’umuryango w’itangazamakuru Danwatch ndetse n’ikinyamakuru cyo mu Bwongereza The Times.

Iperereza ryasesenguye miliyoni z’impapuro zirimo amasezerano, imishinga y’ubwubatsi n’izindi nyandiko, rigaragaza ko Uburusiya bwatangiye gutanga amasoko y’imirimo ijyanye n’uyu mushinga kuva mu 2011.

Kuva mu 2018, Uburusiya kandi bwaguze ku bwinshi ibikoresho bikomeye by’ubwubatsi ndetse na lisansi, mu rwego rwo kubaka iyi ndake nshya imbere mu musozi.

Inyandiko z’amasoko zigaragaza ko iyi nyubako ishobora kuba igizwe n’ibice byo munsi y’ubutaka bigera nibura kuri 24, bifite uburyo bwihariye bwo gutanga umwuka wa ogisijeni (O2).

Intera iri hagati y’aho abantu binjirira muri iyi ndake n’aho bashobora gusohokera mu gihe cy’ingenzi ngo iri hafi kungana na kilometero 2.5.

Umuhanda mushya wubatswe mu gihe cya Covid-19

Imirimo myinshi yo kubaka iyi ndake ngo yakozwe mu myaka ya 2020 na 2021, ubwo isi yari ihanganye n’icyorezo cya Covid-19. Muri icyo gihe kandi, hubatswe umuhanda mushya ugera hafi ku mpinga y’umusozi wa Kosvinski Kamen.

Amakuru yagiye atangazwa n’itangazamakuru avuga kandi ko gahunda y’u Burusiya yo gukoresha intwaro za kirimbuzi yaba yarageze ku rwego rwo gukora neza.

Nta mafoto menshi yerekana imbere muri iyi ndake araboneka. Abasirikare bakorera muri ako gace bafite amabwiriza akomeye abuza cyangwa agabanya ikoreshwa rya telefoni n’ibikoresho bifotora. Icyakora, hari abasirikare bagiye basangiza ku mbuga nkoranyambaga amafoto agaragaza hanze y’iki kigo.

Amafoto amwe agaragaza abasirikare bari mu myitozo ya gisirikare, mu bikorwa byo kurwana no mu mirimo ya gisirikare. Bamwe muri bo bagaragara bambaye masike zirinda imyuka mibi n’ibindi bikoresho byo kwirinda.

Ni nini ku buryo bisi zishobora kwinjiramo

Ubunini bw’uru rusobe rw’inzira zo munsi y’ubutaka bwatangajwe nk’ubudasanzwe.

Uwahoze ari umusirikare wakoreye muri ako gace yavuze ko iyi miyoboro ari minini ku buryo bisi zishobora kwinjira imbere mu musozi, zigatwara abasirikare n’abandi bakozi mu bice bitandukanye by’iki kigo.

Ati: “Urusobe rw’inzira zo munsi y’ubutaka ni runini ku buryo bisi zishobora kwinjiramo zigatwara abakozi mu bice bitandukanye.”

Imishinga y’ubwubatsi yagaragaje ko hari inzira ziri hagati ya metero 4 na 10 z’ubugari ndetse n’ubuhagarike.

Abahanga mu by’umutekano bavuga ko bishoboka ko Moscow yaba yarasize nkana ibimenyetso bimwe by’inyandiko z’ubuyobozi byatuma inzego z’ubutasi z’ibindi bihugu zibona ko iki kigo gihari.

Ibyo bishobora kuba bigamije kongera ubutumwa bwo gukumira ibitero bya kirimbuzi, aho igihugu kigaragaza ko gifite ubushobozi bwo kwihorera nubwo cyaba cyagabweho igitero gikomeye.

Ese Amerika ishobora kuba mu byo u Burusiya butinya?

Iperereza kandi rivuga ko Vladimir Poutine ashobora kuba afite impungenge ku bijyanye n’igitero gishobora kugabwa na Leta Zunze Ubumwe za Amerika.

Impungenge zishingiye ku kuba Amerika yarateje imbere intwaro zishobora kugera ku bintu byihishe cyane munsi y’ubutaka. Ibitero byagabwe kuri Iran mu 2025 na 2026 nabyo bivugwa ko bishobora kuba byaragize uruhare mu kongera izo mpungenge.

Hari kandi impungenge z’uko hashobora kuba ibitero bigamije gukuraho icyarimwe abayobozi bakuru ba politiki n’abasirikare b’igihugu.

Iperereza rihuza izi mpungenge n’urupfu rwa Ali Khamenei n’abari bamwegereye i Tehran, aho bavuga ko igitero nk’icyo cyagaragaje ko abayobozi bakuru bashobora kuba aribo gipimo cy’ibitero bya gisirikare.

Muri uwo murongo, gahunda ya “Perimetr”, izwi cyane nka “Dead Hand”, igaragara nk’uburyo u Burusiya bwateguye kugira ngo ubuyobozi n’ubushobozi bwo gusubiza igitero bya kirimbuzi bikomeze kubaho nubwo ibigo bikuru by’igihugu byaba byibasiwe.

Perezida Putin yubatse indake nini mu ibanga mu misozi ya Ural