Ibihugu 164 byatoye bishyigikira uwo mwanzuro, igihugu kimwe kirawanga, naho ibindi bitandatu birifata. Leta Zunze Ubumwe za Amerika ni yo gihugu cyonyine cyatoye kirwanya uwo mwanzuro.
Uyu mwanzuro wibanda ku kibazo cy’ikarita ya Mercator, ikoreshwa cyane kuva mu kinyejana cya 16. Iyo karita igoreka ingano z’ibihugu n’imigabane bitewe n’intera yabyo uvuye ku murongo ugabanya isi mo kabiri. Ibyo bituma uturere twegereye inkingi z’isi, nka Greenland n’Uburayi, tugaragara nk’aho ari tunini cyane, mu gihe Afurika igaragara nk’aho ari nto ugereranyije n’ingano yayo nyayo.
Afurika ifite ubuso bunini cyane, ku buryo iyo urebye ikarita ya Mercator usanga ubunini bwayo butagaragazwa uko buri ku isi nyakuri. Urugero, Afurika ifite ubuso bungana hafi inshuro 14 ubwa Greenland, nubwo ku ikarita ya Mercator bishobora kugaragara nk’aho bingana.
Mu mwanya w’ikarita ya Mercator, ubukangurambaga bwa “Correct the Map” bushishikariza ibihugu n’ibigo gukoresha amakarita yerekana neza ubuso bw’imigabane, cyane cyane Equal Earth projection, yakozwe mu 2018 igamije kubungabunga isano nyayo y’ubuso bw’ibice bitandukanye by’isi.
Umuryango w’Ubumwe bw’Afurika wari warashyigikiye ikoreshwa rya Equal Earth, uvuga ko igaragaza ingano y’imigabane, cyane cyane Afurika, mu buryo bwuzuye kurusha Mercator.
Togo, ari na yo yari ku isonga muri iyi gahunda, ivuga ko guhindura ikarita atari ikibazo cy’imiterere y’amakarita gusa, ahubwo ko ari n’uburyo isi ibona Afurika. Abayishyigikiye bavuga ko uburyo Afurika yagaragajwe nk’aho ari nto mu makarita yakoreshwaga imyaka myinshi bwagize uruhare mu gutuma abantu batabona neza ubunini n’akamaro k’uyu mugabane.
Gusa, umwanzuro wa ONU ntabwo ari itegeko rihatira ibihugu guhita bireka ikarita ya Mercator. Ahubwo usaba za guverinoma, amashuri, imiryango mpuzamahanga, ibigo by’ikoranabuhanga n’ibindi bigo gukoresha amakarita agaragaza neza ubuso bw’uturere igihe ari ngombwa kugereranya ingano yabyo.
Bityo, nubwo Mercator izakomeza kuboneka ahantu henshi, iki cyemezo cya ONU gishobora gutuma amakarita akoreshwa mu burezi, mu bitangazamakuru no ku mbuga za interineti agenda ahinduka, Afurika ikagaragazwa mu buryo buhuye cyane n’ingano yayo nyayo.
ONU yemeje ikarita nshya igaragaza ingano nyayo y’Afurika