Iyi kipe ya SC Sfaxien yamutangaje nk’umukinnyi wayo mushya kuri uyu wa Kane ibinyujije ku mbuga nkoranyambaga aho yavuze ko yasinye amasezerano y’imyaka 3. Onana yerekeje muri iyi kipe avuye muri Al Hilal Benghazi yo muri Libya yari amazemo umwaka umwe nyuma yo kuva muri Simba SC yo muri Tanzania nayo yari amazemo umwaka umwe.
Onana yamenyekaniye cyane mu ikipe ya Rayon Sports bitewe n’uko yitwaye mu mwaka w’imikino wa 2022/2023. Muri icyo gihe niwe wabaye umukinnyi watsinze ibitego byinshi muri shampiyona.
Yatsinze ibitego 16 muri shampiyona ndetse anatsinda ibindi 5 mu gikombe cy'Amahoro. Onana kandi yafashije kwegukana Murera igikombe cy'Amahoro begukanye batsinze APR FC ku mukino wa nyuma igitego 1-0.
Yerekeje SC Sfaxien ifite ibigwi muri Tunisia aho afite ibikombe birimo 8 bya shampiyona, 7 by’igihugu na 3 bya CAF Confederation Cup. Mu mwaka ushize w’imikino yabaye iya 7 muri shampiyona.
Onana yahawe ikaze muri SC Sfaxien
Onana yamenyekaniye muri Rayon Sports