Urupfu rw’uyu mukinnyi rwamenyekanye ku wa 16 Nzeri 2026, rutangajwe n’umuhungu we, Olusoji Jacobs, abinyujije ku rubuga rwa Instagram. Umuryango we watangaje ko yitabye Imana nyuma y’imyaka myinshi amaze ari umwe mu bakinnyi bubashywe muri Nollywood.
Olu Jacobs yavukiye muri Nigeria ku wa 11 Nyakanga 1942. Yize ibijyanye n’ubuhanzi bwo gukina muri Royal Academy of Dramatic Art i Londres, mbere yo kugaragara mu bitaramo bya televiziyo byo mu Bwongereza no mu mafilime mpuzamahanga.
Nyuma yaje kuba umwe mu bakinnyi bafite izina rikomeye muri sinema ya Nigeria. Yagaragaye mu mafilime menshi, aho yamenyekanye cyane kubera uburyo yakinishaga abantu bafite imyanya ikomeye n’ijwi rye ryihariye.
Mu gihe cy’umwuga we, Olu Jacobs yakoranye n’abakinnyi benshi bakomeye, anagira uruhare mu iterambere rya Nollywood. Yahawe ibihembo bitandukanye, ndetse mu 2011 ahabwa umudari wa Member of the Order of the Federal Republic (MFR) na Leta ya Nigeria kubera uruhare yagize mu guteza imbere ubuhanzi.
Yari kandi umwe mu bashinze Lufodo Group, ikigo yashinze afatanyije n’umugore we, Joke Silva. Muri ibyo bikorwa harimo ishuri rya Lufodo Academy of Performing Arts, ryagize uruhare mu guhugura abantu bashaka gukora umwuga w’ubuhanzi.
Mu myaka ya nyuma y’ubuzima bwe, Olu Jacobs ntiyakigaragaraga cyane mu ruhame. Umugore we Joke Silva yari yarigeze gutangaza ko yari afite Lewy body dementia, indwara igira ingaruka ku mikorere y’ubwonko, imitekerereze n’imyitwarire.
Olu Jacobs yapfuye asize amateka akomeye mu ruganda rwa sinema rwa Nigeria, nyuma yo kumara imyaka isaga 50 akora umwuga wo gukina filime. Umuryango we wasabye abantu, cyane cyane abakoresha imbuga nkoranyambaga, kubaha ubuzima bwabo bwite muri iki gihe cy’akababaro.