Umusaruro wa Thomas Tuchel muri Bayern Munich ukomeje kuba nkene. Ibinyamakuru byo mu Budage no hanze yabwo byatangiye gushyira mu majwi abatoza bashobora gusimbura Tuchel, gusa hagarutsemo izina rya Ole Gunnar Solskjaer wahoze atoza Manchester United.
Ole Gunnar Solskjaer ni izina ritarava mu mitwe y'abafana ba Manchester United kuva mu 1999. Uyu mugabo icyo gihe yari umukinnyi muri Manchester United. Ubwo hari ku mukino wa nyuma wa UEFA champions league, Ole yatsinze igitego cy' ingushyo cyatumye Bayern Munich itakaza UEFA Champions league yo mu 1999, yahise itwarwa na Manchester United.
Kugeza ubu Bayern Munich iri ku mwanya wa kabiri muri shampiyona y' u Budage, gusa irushwa amanota umunani yose na Bayer Leverkusen iri ku mwanya wa mbere. Imikinire ya Thomas Tuchel ntabwo itanga icyizere cy'uko ishobora gufata Bayern Munich ikayivana mu bihe bibi irimo.
Ku cyumweru ubwo Bayern Munich yatsindwaga na Bochum ibitego bitatu kuri bibiri, yongeye kubaho itsinzwe imikino itatu yikurikiranya. Ibyo yabiherukaga nyuma y'imyaka Icyenda ubwo yatozwaga na Joseph Pep Guardiola. Icyo gihe cya Pep Guardiola nubwo Bayern Munich yatsinzwe iyo mikino, yatwaye igikombe cya Shampiyona.
Umusaruro wa Thomas Tuchel kandi ukomeje kuba nkene no mu bitego. Muri iyo mikino itatu Bayern Munich yatakaje, yatsinzwe ibitego birindwi yinjiza ibitego bibiri gusa.
Ubwo inkuru zo kwirunaka Thomas Tuchel zatangiye gucicikana, hari n'abagaruka kuri Xabi Alonso uri kubica bigacika muri Bayer Leverkusen, gusa ibinyamakuru nka Daily Mail, Sky Sports Germany the goal.com ndetse n'abindi byavuze ko umugabo w'ingenzi uri gutekerezwa ari Ole Gunnar Solskjaer ukomoka muri Norway.
Nubwo ngo nta biganiro biraba hagati y'impande zombi, umuyobozi ushinzwe imikino muri Bayern Munich Christophe Freund ngo akunda imikinire ya Ole Gunnar Solskjaer.
Ole Gunnar Solskjaer ubwo yatozaga Manchester United, yayivuyemo yirukanwe, nyuma y'uko ibihe bitari bimeze neza kuri Old Trafford.
Ole Gunnar Solskjaer mu 1999 yababaje Bayern Munich iri kumwifuza
FC Bayern Munich irifuza Ole Gunnar Solskjaer wahoze atoza Manchester United