Nzeri irihiritse! Isize ishusho y’uko umuziki w’u Rwanda wakunzwe n’abawukurikira

Uru rutonde rugaragaza uko abanyarwanda n’abakurikira umuziki nyarwanda bagiye bareba indirimbo kuri YouTube muri Nzeri, aho indirimbo 10 ziriho zose hamwe zarengeje miliyoni 9.4 z’abazirebye muri uku kwezi gusa.

The Ben ni we uza ku isonga ku kigero kinini, mu gihe Vestine na Dorcas, Chriss Eazy, Element EleéeH, Kevin Kade, Bruce Melodie n’abandi bahanzi bagaragaje ko umuziki wabo ukomeje kugira umwanya mu mitima y’abawukurikira.

Indirimbo ‘Inshallah’ ya The Ben ni yo yihariye umwanya wa mbere, aho hagati ya tariki 1 na 29 Nzeri 2026 yari imaze kurebwa inshuro miliyoni 2.67 kuri YouTube.

Ni imibare ishyira The Ben ku mwanya wihariye muri uku kwezi, kuko indirimbo ye iri imbere y’izindi ku ntera irenga miliyoni imwe y’abayirebye ugereranyije n’indirimbo iri ku mwanya wa kabiri.

‘Inshallah’ ni imwe mu ndirimbo The Ben amaze iminsi ashyira imbere mu bikorwa bye bya muzika, ndetse yakomeje gukurura abafana n’abakunzi b’umuziki nyarwanda kuva yasohoka.

Ku mwanya wa kabiri hari ‘Itabaza’ ya Vestine na Dorcas, imaze kurebwa miliyoni 1.27 muri iki gihe.

Uyu mukobwa n’umugore kandi bagaragara bwa kabiri kuri uru rutonde, kuko ku mwanya wa 10 hari ‘Ibihe’, imwe mu ndirimbo baherutse gushyira hanze, imaze kurebwa 514,000.

Ibi bivuze ko Vestine na Dorcas ari bo bahanzi bafite indirimbo ebyiri kuri uru rutonde, nk’uko na Chriss Eazy na Element EleéeH babigenje mu buryo butandukanye.

Umwanya wa gatatu wafashwe na Kevin Kade binyuze mu ndirimbo ‘So Close’, imaze kurebwa 987,000.

Iyi ndirimbo iri mu zagaragaje ko Kevin Kade akomeje kugira abakunzi bamukurikirana ku rubuga rwa YouTube, aho yashoboye kwinjira muri batatu ba mbere b’uku kwezi.

Chriss Eazy ni undi muhanzi wagaragaje imbaraga kuri uru rutonde, aho afite indirimbo ebyiri muri 10 za mbere.

Ku mwanya wa kane hari ‘My Mind’ ya Utah Nice na Chriss Eazy, imaze kurebwa 948,000.

Ni mu gihe ku mwanya wa karindwi hari ‘Wakanaka’ ya Chriss Eazy na King James, imaze kurebwa 672,000.

Bivuze ko Chriss Eazy ari mu bahanzi bagize uruhare mu ndirimbo ebyiri zitandukanye zashoboye kwinjira mu zikunzwe cyane muri Nzeri, nubwo yazigiyemo mu mikoranire itandukanye.

Element EleéeH na we afite indirimbo ebyiri kuri uru rutonde, ariko zombi azisangamo mu buryo butandukanye.

Ku mwanya wa gatanu hari ‘My Dear’ ya Element EleéeH, imaze kurebwa 928,000.

Uyu muhanzi kandi agaragara ku mwanya wa munani binyuze mu ndirimbo ‘Ninde’ yakoranye na Shaffy, imaze kurebwa 618,000.

Ibi byerekana ko Element EleéeH akomeje kugaragara mu ndirimbo ziri gukurikirwa cyane, haba mu ndirimbo ze bwite ndetse no mu mishinga ahuriramo n’abandi bahanzi.

Ku mwanya wa gatandatu hari ‘Irya 4’ ya Bruce Melodie, imaze kurebwa 708,000.

Bruce Melodie ni umwe mu bahanzi bamaze igihe bafite abakunzi benshi bakurikira ibikorwa bye, kandi imibare ya Nzeri igaragaza ko ‘Irya 4’ nayo yabashije kwinjira mu ndirimbo 10 zakunzwe cyane muri uku kwezi.

Ku mwanya wa cyenda hari ‘Soldier’ ya TiMi na Kpee, imaze kurebwa 530,000.

Nubwo iri ku mwanya wa cyenda, iyi ndirimbo nayo iri mu zashoboye kwinjira muri uru rutonde rw’abahanzi n’indirimbo zakunzwe cyane mu Rwanda hagati ya tariki 1 na 29 Nzeri 2026.

Iyo urebye uru rutonde muri rusange, rugaragaza ko Nzeri 2026 yabaye ukwezi kurimo abahanzi batandukanye, aho bamwe bagaragaye inshuro zirenze imwe, abandi bakinjira mu rutonde binyuze mu mikoranire.

The Ben ni we wayoboye urutonde ku buryo bugaragara, akurikirwa na Vestine na Dorcas, mu gihe Kevin Kade yafashe umwanya wa gatatu.

Chriss Eazy na Element EleéeH buri umwe afite indirimbo ebyiri kuri uru rutonde, naho Vestine na Dorcas bakagaragara ku myanya ibiri itandukanye.

Indirimbo 10 zakunzwe cyane mu Rwanda muri Nzeri 2026

1.‘Inshallah’ – The Ben: 2.67M views

2.‘Itabaza’ – Vestine & Dorcas: 1.27M views

3.‘So Close’ – Kevin Kade: 987K views

4.‘My Mind’ – Utah Nice & Chriss Eazy: 948K views

5.‘My Dear’ – Element EleéeH: 928K views

6.‘Irya 4’ – Bruce Melodie: 708K views

7.‘Wakanaka’ – Chriss Eazy & King James: 672K views

8.‘Ninde’ – Shaffy & Element EleéeH: 618K views

9.‘Soldier’ – TiMi & Kpee: 530K views

10.‘Ibihe’ – Vestine & Dorcas: 514K views

The Ben ni we wayoboye urutonde rw’indirimbo zakunzwe cyane mu Rwanda muri Nzeri, aho ‘Inshallah’ ye yarebwe inshuro miliyoni 2.67 kuri YouTube

Chriss Eazy ni umwe mu bahanzi bigaragaje muri Nzeri, aho indirimbo ebyiri yagizemo uruhare, ‘My Mind’ na ‘Wakanaka’, zombi ziri mu 10 zakunzwe cyane kuri YouTube mu Rwanda

Vestine na Dorcas bagaragaje imbaraga muri Nzeri, aho ‘Itabaza’ na ‘Ibihe’ zabo zombi zinjiye mu ndirimbo 10 zakunzwe cyane kuri YouTube mu Rwanda