Nyuma yo kuzuza Miliyoni 1 kuri YouTube, Papa Sava agiye gukora filime y’uruhererekane

Mu kiganiro na InyaRwanda, Papa Sava yashimangiye ko kugera kuri uyu mubare w’abakunzi ari intambwe ikomeye mu rugendo rwe rwo gukomeza gusakaza ibihangano bye.

Yagize ati: “Ndishimye cyane kugera ku gahigo ka miliyoni imwe y’abamukurikira kuri YouTube. Ni intambwe ikomeye ku rugendo rwanjye mu gukomeza kugeza ibihangano byanjye ku bantu benshi.”

Uyu mukinnyi avuga ko mu rwego rwo gukomeza kwagura ibikorwa bye, ari gutegura filime y’uruhererekane (series) izakorwa na Zacu Entertainment.

Ati: “Ubu ndi gutegura filime y’uruhererekane izajya kuri Zacu TV, kandi niyo nzahugiraho cyane. Nzatangira gufatira amashusho nyuma y’icyumweru cyo Kwibuka ku nshuro ya 32 Jenoside yakorewe Abatutsi mu 1994,”

Yasobanuye ko iyi filime mbarankuru izakorwa mu buryo busanzwe bwa Zacu TV. Ati “Ntabwo izina ry’iyi filime turaritangaza ubu, ariko turi kwandika umushinga, turashaka aho amashusho azafatirwa, kandi guhitamo abakinnyi twageze kuri hafi 80%.”

Papa Sava yaciye agahigo nk’umwe mu Banyarwanda bageze kuri uyu mubare w’abakunzi kuri YouTube, abandi barimo nka Israel Mbonyi, Meddy n’abandi benshi.

Uyu mushinga mushya werekana ko Papa Sava atagumye ku rubyiniro rwa filime gusa, ahubwo ari no kwagura ibikorwa bye mu ikoranabuhanga no ku mbuga nkoranyambaga, agaragaza ko abahanzi bashobora guhanga imipaka mishya mu rugendo rwabo rw’ubuhanzi.

Mu gihe amaze imyaka irenga 30 mu rugendo rw’ubuhanzi, Niyitegeka Gratien uzwi nka Papa Sava, yanyuze mu byiciro bitandukanye byamugize umwe mu bakinnyi ba filime bakunzwe cyane mu Rwanda.

Papa Sava yatangiye kugaragara mu makinamico yo hambere yakundwaga cyane kuri Radiyo no kuri Televiziyo. Icyo gihe, yubatse izina nk’umukinnyi ufite impano yo gusetsa no gutanga ubutumwa bufite igisobanuro.

Izina “Papa Sava” ryabaye ikirango cye nyuma yo gukina mu yitwa iryo zina, aho yagaragaye nk’umugabo w’umunyarwenya ufite imyitwarire ituma abantu bamwibonamo. Iyi myitwarire yamugize icyamamare mu gihugu hose.

Mu bihe sinema nyarwanda yari itaratera imbere cyane, Papa Sava yabaye umwe mu bayishyigikiye, akomeza gukora no mu bihe bigoye, bituma uyu mwuga ugira icyerekezo.

Uretse gukina, yagiye agaragara no mu gutunganya filime, gutanga ibitekerezo ku nkuru, ndetse no kuyobora ibikorwa bimwe na bimwe by’ubuhanzi.

Mu myaka ya vuba, yagiye yimukira cyane ku mbuga nka YouTube, aho yakomeje gususurutsa abakunzi be binyuze mu biganiro n’amakinamico. Ibi byamufashije kugera ku rubyiruko no kwagura umubare w’abamukurikira.

Mu 2026, Papa Sava yinjiye mu banyempano bake mu Rwanda bafite abamukurikira miliyoni 1 kuri YouTube, ibintu byamushyize ku rutonde rumwe n’abahanzi bakomeye nka Israel Mbonyi na Meddy.

Papa Sava ni umwe mu banyabugeni bake bashoboye kugumana izina igihe kirekire, ahinduranya uburyo akoramo ariko akomeza kugumana abakunzi. Uru rugendo rwe rugaragaza ubwitange, guhanga udushya no gukunda ibyo akora.

Papa Sava agiye gutangira filime y’uruhererekane nyuma yo kugera kuri miliyoni 1 kuri YouTube. Aha yari kumwe n'ababyinnyi b'iyi filime mu kwizihiza intsinzi yagezeho

Shene ye ya YouTube imugejeje ku bakunzi miliyoni imwe, Papa Sava akomeza gutera intambwe mu buhanzi 

Nyuma y’imyaka 30 mu buhanzi, Papa Sava yinjiye mu cyiciro gishya cyo gukora filime izatambuka kuri Zacu TV

Papa Sava ari kumwe na Mama Sava mu birori byo kwizihiza intsinzi yagezeho yo kuzuza Miliyoni 1 ku muyoboro wa Youtube

Papa Sava ari kumwe n’umukinnyi wa filime Regero Norbert [Digidigi] wamamaye muri filime Papa Sava

KANDA HANO UREBE IGICE GISHYA CYA FILIME YITWA ‘PAPA SAVA’