Kuri iki Cyumweru saa kumi Nebyiri n’iminota 30 kuri Old Trafford nibwo Manchester United yari yakiriye Liverpool mu mukino wo ku munsi wa 35 wa shampiyona y’u Bwongereza.
Ikipe ya Manchester United yatangiye umukino ikina yihuta cyane ubundi bidatinze ku munota wa 6 ihita inafungura amazamu ku ishoti ryari rirekuwe na Matheus Cunha ubundi Alexis Mac Allister arihindurira ikerekezo rijya mu izamu.
Iyi kipe y’amashitani atukura yakomeje kwatsa umuriro imbere y’izamu rya Liverpool arinako umunyezamu wayo Freddie Woodman akora amakosa.
Ku munota wa 14 Manchester United yabonye igitego cya kabiri ku makosa yari avuye Kuri uyu munyezamu aho yari akuyemo umupira ubundi birangira awihereye Benjamin Sesko awushyira mu nshundura.
Nyuma yo gutsindwa igitego cya kabiri Liverpool nayo yatangiye gukina ihererekanya neza ariko kugera imbere y’izamu bikaba ikibazo.
Ku munota wa 27 Manchester United yashoboraga kubona igitego cya gatatu ku mupira mwiza wari uhinduwe na Brayan Mbeumo ubundi Bruno Fernandes arekura ishoti ariko rinyura impande y’izamu gato.
Hari aho Ryan Gravenberch yari abonye umupira imbere y’izamu ashobora kuwubyzw umusaruro ariko biranga igice cya mbere kirangira Manchester United iyoboye n’ibitego 2-0.
Mu gice cya kabiri Manchester United yaje ikora impinduka mu kibuga hajyamo Amad Diallo asimbuye Benjamin Sesko.
Nyuma yo kwinjira asimbuye ku munota wa 47 yahise akora amakosa yihera umupira Dominic Szoboszlai ahita awugerana imbere y’izamu atsinda igitego cya mbere cya Liverpool.
Ku munota wa 55 Liverpool yabonye igitego cya kabiri ku makosa yari akozwe na Senne Lammens yihera umupira Alexis Mac Allister nawe awushyira kwa Szoboszlai nawe awuha Cody Gakpo ubundi awushyira mu nshundura.
Ku munota 77 Kobbie Mainoo yatsindiye Manchester United igitego cya gatatu ubundi birangira itsinze Liverpool ibitego 3-2.
Kuri ubu Manchester United iri ku mwanya wa Gatatu ikaba irusha amanota atandatu Liverpool iyikurikiye ku mwanya wa Kane naho ikarusha amanota 12 Bournemouth iri ku mwanya wa 6.
Bivuze ko ubu n’iyo Manchester United yatsindwa imikino yose isigaye kugira ngo shampiyona irangire n’ubundi yasoreza mu myanya itanu ya mbere Kandi muri Champions League itaha u Bwongereza buzahagararirwa n’amakipe atanu.
Manchester United yakatishije itike yo kuzakina imikino ya UEFA Champions League
