Nyirakuru wa Eminem yitabye Imana

TMZ yanditse ko yitabye Imana ku wa Kabiri, azize kanseri y’ibere (breast cancer) yari amaranye igihe. Nubwo urupfu rw’uyu mukecuru rwababaje benshi mu muryango, amakuru avuga ko Eminem atari kumwe na nyirakuru mu masaha ye ya nyuma.

Betty yari nyina wa Debbie, ari we nyina wa Eminem. Na Debbie na we yitabye Imana mu Ukuboza 2024 nyuma yo kurwara kanseri y’ibihaha yo ku rwego rwo hejuru. Ibi byatumye Eminem abura abantu babiri bakomeye mu muryango we mu gihe kitari kirekire.

Nubwo Betty yari umwe mu bagize umuryango wa hafi wa Eminem, umubano wabo ntiwigeze uba mwiza buri gihe.

Mu mwaka wa 2000, Betty yigeze kugirana ikiganiro n’ikinyamakuru Mirror cyo mu Bwongereza, aho yavuze amagambo agaragaza agahinda yari afite ku mpinduka yabonaga ku mwuzukuru we.

Yagize ati: “Mu myaka igera kuri 12 gusa, yavuye ku kumvuga ati ‘Nyogokuru ndagukunda,’ ageze aho ambwira ati ‘Jya ikuzimu.’ Ibyo bimbabaza umutima cyane.”

Yakomeje avuga ko byamubabazaga kubona uwo mwana yari azi ari mwiza kandi witonda ahindutse umuntu batari bagisobanukirwa.

Akomeza agira ati: “Sinabyemera ko uyu ari Marshall wanjye, wa mwana wajyaga aza akicara ku bibero byanjye.”

Marshall Mathers ni ryo zina nyaryo rya Eminem, izina abafana be benshi bamenye mbere y’uko aba icyamamare mu muziki wa rap.

Nubwo ari mu bihe by’akababaro kubera urupfu rwa nyirakuru, ubuzima bwa Eminem na bwo burimo ibyishimo ku rundi ruhande, kuko mu mwaka ushize yinjiye mu cyiciro gishya cy’ubuzima bwo kuba sekuru.

Mu Mata 2025, umukobwa we Hailie Jade Mathers yibarutse umwana we wa mbere yabyaranye n’umugabo we Evan McClintock.

Nyuma y’ivuka ry’uyu mwana, Hailie n’umugabo we bahise batangaza izina rye, bagaragaza ko ari icyubahiro cyihariye bahaye Eminem.

Uwo mwana bamwise Elliot Marshall McClintock, aho “Marshall” ari izina nyaryo rya Eminem.

Si ibyo gusa, kuko Eminem agiye kuba sekuru vuba. Mu Ukwakira 2025, undi mukobwa we Alaina Scott yatangaje ko atwite.

Alaina ni umukobwa wa Dawn Scott, mushiki w’impanga wa Kim Scott wahoze ari umugore wa Eminem. Nyuma y’urupfu rwa Dawn, Eminem ni we wafashe inshingano zo kumurera nk’umubyeyi.

Alaina yatangaje ko ategereje umwana mu mafoto yasangije abakunzi be ari kumwe n’umugabo we Matt Moeller. Muri ayo mafoto yari afite agapira k’umwana kanditseho amagambo agaragaza ko yitegura kwibaruka.

Urupfu rwa Betty rwongeye kugarura ibihe by’amarangamutima ku buzima bwa Eminem, cyane ko mu myaka mike ishize yabuze nyina Debbie.

Nubwo amateka y’umubano we n’abo mu muryango atigeze aba yoroshye buri gihe, urupfu rw’umuntu mukuru mu muryango rukunze kugarura ibihe byo kwibuka amateka n’ibihe byabayeho.

Nyirakuru wa Eminem witwaga Betty yitabye Imana afite imyaka 87 azize kanseri y’ibere, mu gihe uyu muraperi w’icyamamare ku isi ari mu bihe by’amarangamutima nyuma y’uko mu myaka mike ishize na nyina Debbie na we yitabye Imana

Betty, nyirakuru w’umuraperi w’icyamamare Eminem, ubwo yari hanze y’urusengero ku wa 22 Ukwakira 2004, aho yari afite umubano utari woroshye n’uyu muraperi