Ntituraganira ariko byabaye isomo kuri twe – Yampano yiteguye kurangiza amakimbirane ye na Marina – VIDEO

Hagati ya Mata na Gicurasi 2025, Yampano na Marina bashyuhije cyane uruganda rw’imyidagaduro nyuma y’uko indirimbo bari bamaze gukorana isibwe kuri YouTube. Marina yavugaga ko Yampano yamusuzuguye kuko atubahirije amasezerano bari bagiranye yo kuyikorera amashusho, mu gihe Yampano yasubizaga ko ibyo atari ikibazo cyari gikwiye guteza impaka zikomeye.

Uwo mwuka mubi watumye bombi baterana amagambo ku mbuga nkoranyambaga ndetse no mu itangazamakuru, bituma umushinga wabo uhagarara ndetse nta kindi gihangano bongeye guhuriramo kuva icyo gihe.

Mu kiganiro cyihariye yagiranye na InyaRwanda, Yampano yavuze ko kuva icyo gihe atigeze aganira na Marina ngo bashyire hamwe umuti w’ikibazo cyabo. Gusa yemeza ko ibyo byabaye ari isomo rikomeye kuri bombi.

Yagize ati "Urumva ntabwo twari twabiganira. Ntabwo nabeshya, ariko ndabizi neza y'uko ntabwo dufitanye ikibazo mu by'ukuri cyo kuvuga ngo twajya mu nkiko, ndamuvuga nabi aho atari, ahubwo ikintu kiba cyarabayeho ni isomo kuri njye nawe."

Yampano yavuze ko yizeye ko indirimbo ye na Marina yigeze gusibwa kuri YouTube izongera igasohoka, ndetse ko bazakorana izindi ndirimbo nshya.

Ati "N'iriya twakoranye izasohoka, kandi tuzakorana n'izindi. Kubera ko njyewe nkunda Marina, nkunda Marina, arabizi ko nabimubwiraga na mbere y'uko tujya muri 'studio'.”

Uyu muhanzi yavuze ko nubwo kugeza ubu batarongera kuganira, yiteguye ko indirimbo bari barakoranye izakorerwa amashusho kandi igasohoka.

Ati “Ntabwo turavugana. Ariko abahanzi ni gutya tuvugana. Ubu, turi kuvugana. Ahari yumve ko tuzayikore, cyereka abaye ariwe ubyanze ariko tuzayikora, twongere tuyikore, dukore izindi.”

Yampano yongeyeho ko yifuza no gukorana na Marina EP ndetse no gutegura igitaramo bahuriramo, kuko bombi bafite abafana n’abakunzi babakurikira mu bikorwa byabo bya muzika n’ubucuruzi.

Ati “Binabaye byiza, twakorana EP, kubera ko turi mu bucuruzi. Afite abantu bamwumva, yaba nanjye mfite abantu banyumva, rero duhuje abo bantu tugakora indirimbo irenze imwe, tukaba twakorana n'igitaramo tubiganiriyeho, kandi iki ni cyo gihe kugirango tube umurongo."

Yampano yatangaje ko ibyabaye hagati ye na Marina byasize amasomo kuri bombi 

Yampano yavuze ko yiteguye gukorana indirimbo nyinshi na Marina no kuyikoreramo amashusho

KANDA HANO UREBE IKIGANIRO CYIHARIYE TWAGIRANYE NA YAMPANO

KANDAHANO WUMVE INDIRIMBO YAMPANO YAKORANYE NA UNCLE AUSTIN