Nta ‘Superstar’ waramya Imana mu buryo nyabwo – Bishop Benjamin

Buri mwaka muri Women Foundation Ministries haba igiterane gikomeye cy'iminsi 7 yo kuramya no guhimbaza Imana, cyizwi nka "7 Days of Worship". Ni igiterane mbaturamugabo gitumirwamo abaramyi b'amazina azwi mu gihugu no hanze yacyo.

By'umwihariko kuri uyu munsi wa gatanu w'iminsi 7 y'igiterane cyo kuramya Imana cyo muri uyu mwaka wa 2025, hari hatumiwe abakozi b’Imana baturutse mu bihugu bitandukanye, barimo Bishop Benjamin Dube waturutse muri Afurika y’Epfo, Rev. Julian Kyula wo muri Kenya, na Nduwimana David waturutse muri Australia.

Kuwa 12 Kamena 2025, iki giterane cyabereye mu Ubumwe Grande Hotel - byari ku munsi wa kane w'iki giterane, muri gahunda yiswe Ministers' Breakfast. Mu ijambo rye ry’ikaze, Apostle Mignonne Kabera yavuze ko nyuma y’imyaka 31 Jenoside yakorewe Abatutsi mu Rwanda ihagaritswe, yabonye Imana izamura abaramyi.

Ati: “Ndashimira Imana ko uyu munsi mu Rwanda, mu mubiri wa Kristo, dufite abaramyi benshi cyane.” Yakomeje ashimira Bishop Benjamin Dube, ati: “Ndagushimiye wemeye kuba umwe mu bantu baje kubiba imbuto muri iki gihugu.”

Benjamin Dube ageze ku ruhimbi, yashimiye Apotre Mignonne Kabera wamutumiye, amugenera impano y’ibitabo bibiri yanditse bikubiyemo bimwe mu byamufashije mu buzima bwe.

Yavuze ko nubwo abantu benshi bahuza kuramya Imana no kuririmba, ariko mu by’ukuri ari ubuzima buri wese yagakwiye kubamo, atari abakristo gusa, ahubwo abantu bose muri rusange. Ati: “Ikintu cyose gihumeka, kigomba kuzirikana no kumenya Imana yakiremye.”

Yakomeje agira ati: “Ndifuza ko duhindura imyumvire y’abakozi b’Imana mu rusengero, bakava mu kuba abaririmbyi n’abahanzi, ahubwo bakaba abakozi b’Imana. Ukuri ni uko nta muntu w’umusitari cyangwa wumva ko arenze (superstar) waramya Imana mu buryo nyabwo. Sinkubujije kuba umusitari n’umuntu urenze, bibe hanze ariko mu rusengero nta musitari, nta muntu urenze.” Ati: “Imana ntabwo irimo gushaka abasitari bo hejuru ahubwo irashaka abantu bo hasi.”

Yavuze ko nta muntu n’umwe ushobora gushitura Imana mu gihe cyose yizamura hejuru akishyira mu mwanya wayo, asaba abantu kwicisha bugufi kugira ngo bazamurwe. Ati: “Rimwe na rimwe abantu bazakuzamura, bakogeze, ariko ejo n’ejobundi bazahinduka. Ibyo bihe nabinyuzemo.”

Yatanze ubuhamya, avuga ko rimwe yigeze kwishimira kuratwa amashimwe nk’abandi bahanzi bose, agashimishwa n’uko abantu bamukomera amashyi, ariko Imana iza kumusanga iramuganiriza, imubwira ko ari umuramyi w’ikinyoma. Ati: “Ubuzima bw’umuramyi bugomba kuba ku mavi buvuga ngo ‘ntabe ari njye, ahubwo ubushake bwawe Mana abe aribwo buba’.”

Bishop Benjamin yasomye ibyanditswe bitandukanye, agaragaza uko abantu bagakwiriye kuramya Imana by’ukuri, bitandukanye n’uko benshi basanzwe babifata, ugasanga baribwira ko bari kuramya Imana nyamara barimo kwiramya ubwabo.

Mu byamamare byitabiriye iki giterane cyatumiwemo Bishop Benjamin Dube, harimo abaramyi bakomeye nka Aimee Uwimana, Gaby Kamanzi, Prosper Nkomezi, Rene na Tracy, Yvan Ngenzi n'abandi.

Apostle Mignonne Kabera yigeze gusobanura byinshi ku ntego y'iki giterane n'impamvu bacyise icyo kuramya no guhimbaza Imana. Ati: "Iyo tuvuze kuramya no guhimbaza Imana hari abantu benshi batekereza kuririmba no kubyina, ariko sibyo gusa ahubwo imibereho ya muntu ikwiriye kuba nayo iramya ikanahimbaza Imana buri munsi.

Kuba rero tuba dushaka ko abantu basobanukirwa ibi, niyo mpamvu dutumira abaririmbyi badufasha kuyiramya turirimba ariko tukanatumira abandi bakozi b’Imana badufasha mu gusobanura iyi nsanganyamatsiko yo kuramya no guhimbaza Imana nyakuri icyo aricyo binyuze mu biganiro bibera muri iki giterane ".

Benjamin Dube uri i Kigali, yavutse kuwa 23/01/1962. Yashakanye na Thabile Dube bafitanye abana bane: Buhle Dube, Mthokozisi Dube, Sihle Dube na Mangi Dube. Ni umuramyi akaba n'umupasiteri uyobora High Praise Centre muri Voslorus mu Burasirazuba bwa Johannesburg. Akunzwe mu ndirimbo "He keeps on doing", "Yiwo Lawa Amandla", "Ngiyakuthanda" n'izindi.

Uyu muvugabutumwa akaba rurangiranwa mu baramyi muri Afurika, yaherukaga i Kigali mu 2022, ubwo yari yitabiriye igitaramo cyateguwe na Rwanda Events ifatanyije na AFLEWO Rwanda. Si icyo gihe gusa, kuko no mu 2019 yataramiye mu Rwanda muri Intare Arena i Rusororo.

Women Foundation Ministries ni umuryango mpuzamahanga udaharanira inyungu, washinzwe n’Intumwa y'Imana Alice Mignonne Kabera Umunezero mu 2006 ndetse kugeza uyu munsi akaba ari we uwuyoboye. Uyu muryango uzwi mu bikorwa bitandukanye bishingiye ku myemerere birimo kubaka umuryango nyarwanda binyuze mu mugore.