Uyu mukino urakinwa kuri uyu wa Gatatu saa Yine z’Ijoro kuri Santiago Bernabeu. Iyi ni inshuro ya 16 aya makipe yombi agiye guhura mu mateka ya Champions League. Mu Nshuro 15, Real Madrid yatsinzemo 5, Manchester City itsindamo 5, banganya 5. Manchester City yinjijemo ibitego 26 naho Real Madrid yinjizamo 25. Muri iyi myaka irindwi iheruka yo iyi ni inshuro 7 bagiye guhura.
Imikino ine Real Madrid iheruka guhuramo n’amakipe yo mu Bwongereza yose yarayitsinzwe. Manchester City yo yatsinzwe imikino itatu yonyine mu mikino 18 iheruka guhuramo n’amakipe yo muri Espagne.
Kuva muri 2004 nta na rimwe Real Madrid irananirwa kugera muri 1/8 cya UEFA Champions League. Mu mikino 15 iheruka ya 1/8 muri Champions League kuri Real Madrid yatsinzemo 13.
Vinícius Júnior yatsinze ibitego mu mikino ine iheruka ya UEFA Champions League ikipe ya Real Madrid yakinnye. Mu bitego 13 aheruka gutsinda muri iri rushanwa, 12 yabitsinze mu gice cya kabiri cy’umukino, aho harimo n’ibitego birindwi biheruka byose yatsinze mu gice cya kabiri.
Kylian Mbappé amaze gutsinda ibitego 13 muri Champions League ya 2025/26, akaba ari bwo bwa mbere ageze kuri uwo mubare munini muri iri rushanwa. Mu mikino yakinnye na Manchester City, amaze gutsinda ibitego 7 mu mikino 7. Harimo na 'Hat-trick' yatsinze mu mukino Real Madrid yatsinzemo City ibitego 3–1 i Madrid mu mikino ya kamarampaka (knockout phase) ya shampiyona iheruka.
Manchester City yatsinze imikino 5 muri 8 yakinnye mu cyiciro cya league phase cya Champions League y’uyu mwaka (banganyije umwe, batsindwa ibiri).
Erling Haaland amaze gutsinda ibitego 56 mu mikino 56 yakinnye muri Champions League. Muri byo harimo ibitego 10 yatsinze mu mikino 10 yakinnye ahura n’amakipe yo muri Espagne.
Real Madrid igiye guhura na Manchester City ku nshuro ya 16