Itsinda ry'abajura ryabashije kwinjira mu bubiko bwari buzwiho kugira umutekano ukomeye kurusha ubundi ku Isi, rihungana diyama, zahabu n'indi mitungo y'agaciro kagereranywa hagati ya miliyoni 100 na 500 z'amadolari ya Amerika.
Icyatumye ubu bujura buba amateka si agaciro k'ibyibwe gusa, ahubwo ni uburyo bwakozwemo. Nta sasu ryaturitse, nta rugi rwamenwe, nta murinzi wakomeretse cyangwa ngo afatwe bugwate. Ahubwo abajura bakoresheje ubwenge, kwihangana no gutegura neza, batsinda uburyo bw'umutekano bwafatwaga nk'ubudashobora gutsindwa.
Antwerp ni umwe mu mijyi ikomeye cyane mu bucuruzi bwa diyama ku Isi. Bivugwa ko hafi 80% bya diyama zicuruzwa ku Isi zinyura muri uyu mujyi.
Munsi y'inyubako ya Antwerp Diamond Centre hari icyumba cyabikwagamo diyama n'indi mitungo y'agaciro gakomeye. Cyari kirinzwe n'ikoranabuhanga rigezweho, ririmo inzugi z'ibyuma bikomeye, camera zigenzura buri hantu, ibyuma bipima ubushyuhe, sensors zifata urusaku n'uko umuntu agenda, imirasire ya laser ndetse n'ingufuri zidasanzwe zafatwaga nk'izidashobora gufungurwa n'abajura. Ku bantu benshi, kwinjira muri icyo cyumba byasaga n'ibidakunda.
Umugambi wamaze imyaka ibiri utegurwa
Ariko umugabo w'Umutaliyani witwaga Leonardo Notarbartolo yari afite indi gahunda. Yiyerekanye nk'umucuruzi usanzwe wa diyama maze akodesha ibiro muri iyo nyubako. Mu gihe cy'imyaka ibiri, we n'itsinda rye bakomeje kwiga buri kantu kose k'umutekano wari uhari.
Bakurikiranaga amasaha abarinzi bahinduriragaho akazi, uburyo camera zikora, aho sensors zashyizwe n'intege nke zose zari muri sisitemu y'umutekano. Iyo myaka yose yari iy'itegurwa gusa.
Mu ijoro ryo ku wa 15 Gashyantare 2003, umugambi washyizwe mu bikorwa. Abajura babashije kurenga inzitizi zose zari zibabuza kugera mu bubiko bukuru.
Bakoresheje uburyo butandukanye bwo kuyobya cyangwa kuzimya sensors zimwe na zimwe, bafungura ingufuri zidasanzwe banarenga urumuri rwa laser rwari rugamije kuburizamo uwashakaga kwinjira.
Bamaze kugera mu bubiko, bafunguye amasanduku arenga 100, barimo diyama, zahabu, amafaranga n'ibindi bintu by'agaciro, bahita babihungana. Igitangaje kurushaho ni uko nta rugi bamenaguye, nta gisasu bakoresheje ndetse nta murinzi bigeze bagirira nabi.
Mu gitondo cyakurikiyeho, abashinzwe umutekano bageze ku kazi basanga ububiko bwamaze gusahurwa, ariko nta kimenyetso cy'uko bwari bwinjiriwemo ku ngufu.
Ikosa rimwe ryatumye umugambi utangira gusenyuka
Polisi yahise itangira iperereza rikomeye. Nyuma y'iminsi mike, hari imyanda yari yajugunywe hafi y'ishyamba yaje kubonekamo ibimenyetso byafashije abashinzwe iperereza kumenya bamwe mu bagize iri tsinda.
Muri bo harimo na Leonardo Notarbartolo, wahise atabwa muri yombi.
Nubwo yakatiwe igifungo, yakomeje kuvuga ko atari we wari uyoboye umugambi wose, ahubwo ko hari abandi bantu bakomeye batigeze bafatwa. Icyakora, igice kinini cya diyama n'indi mitungo y'agaciro byibwe nticyigeze kiboneka kugeza n'uyu munsi.
Ubujura bwabaye isomo ku Isi
Nyuma y'ubu bujura, ibigo byinshi bibika diyama, amabanki n'ahandi habikwa ibintu by'agaciro byahise bisubiramo uburyo bwabyo bwo kwirinda ubujura.
Byagaragaye ko n'ubwo wakoresha ikoranabuhanga rigezweho, umutekano ushobora gutsindwa iyo abantu bawumaze igihe kinini bawiga kandi bagategura neza uburyo bwo kuwurenga.
Ni yo mpamvu ibigo byinshi byatangiye gukaza igenzura ku bantu bakodesha ibiro, abakozi ndetse n'abandi bose binjira ahabikwa ibintu by'agaciro.
Hashize imyaka irenga 20 ubu bujura bubaye, ariko igice kinini cya diyama zifite agaciro ka miliyoni amagana z'amadolari kiracyaburirwa irengero.
Ni imwe mu nkuru z'ubujura zakomeje kuvugisha Isi, kuko yerekanye ko n'umutekano wafatwaga nk'udashobora kuvogerwa ushobora gutsindwa n'umugambi uteguwe neza, bituma ubujura bwa Antwerp Diamond Centre bukomeza gufatwa nk'imwe mu nkuru zidasanzwe kandi z'amayobera mu mateka y'ubugizi bwa nabi.