Norvege: Umuhungu w'Igikomangomakazi Mette-Marit yakatiwe imyaka ine y’Igifungo

Høiby ni umuhungu wa Mette-Marit, umugore wa Prince Haakon, uzungura ingoma y’Ubwami bwa Norvege. Nubwo atari umwe mu bagize umuryango w’ibwami ku buryo bwemewe n’amategeko, yamenyekanye cyane kuva nyina yashyingiranwa na Prince Haakon mu 2001.

Urubanza rwe rwakurikiwe cyane n’itangazamakuru ndetse n’abaturage ba Norvege kubera izina rikomeye ry’umuryango akomokamo. Mu mwanzuro warwo, urukiko rwahamije Høiby ibyaha bibiri byo gufata ku ngufu, harimo icyabereye mu nyubako ifitanye isano n’umuryango w’ibwami.

Icyakora, yahanaguweho ibindi birego bibiri byo gufata ku ngufu yari akurikiranyweho, nyuma y’uko urukiko rusanze ibimenyetso bitahagije kugira ngo abihamishwe.

Abashinjacyaha bari basabye ko ahanishwa igifungo cy’imyaka irindwi n’amezi arindwi, ariko urukiko rwemeza ko imyaka ine ihagije hashingiwe ku byaha rwamuhamije.

Mu gusobanura icyemezo cyarwo, urukiko rwavuze ko rwabonye ibimenyetso bihagije byerekana ko umwe mu bagore wamushinjaga atari afite ubushobozi bwo kwirwanaho cyangwa kwanga ibyo yakorerwaga.

Umucamanza Jon Sverdrup Efjestad yavuze ko ari imwe mu mpamvu z’ingenzi zatumye Høiby ahamwa n’icyaha cyo gufata ku ngufu.

Mu gihe icyemezo cyatangazwaga, Høiby ntiyari mu cyumba cy’urukiko. Yakurikiranye isomwa ry’urubanza hifashishijwe ikoranabuhanga ryo gutambutsa amashusho ari aho afungiye.

Umwe mu bagore bamushinjaga ni we wenyine wari witabiriye isomwa ry’urubanza. Ibitangazamakuru byo muri Norvege byatangaje ko yagaragaje amarangamutima menshi ndetse akarira ubwo yumvaga umucamanza atangaza ko Høiby ahamwe n’icyaha cyo kumufata ku ngufu.

Mu gihe cy’ibyumweru birindwi uru rubanza rwamaze ruburanishwa, urukiko rwabonyemo ibimenyetso byinshi birimo ubutumwa bwanditse amagana, amakuru ajyanye n’imikoreshereze y’ibiyobyabwenge ndetse n’ibindi bimenyetso byafashije urukiko mu gufata umwanzuro warwo.

Høiby yakomeje guhakana ibyaha bikomeye yari akurikiranyweho, nubwo yemeye bimwe mu byaha byoroheje. Afite uburenganzira bwo kujuririra iki cyemezo.

Iyi dosiye yakomeje kuvugisha benshi muri Norvege no hanze yayo kubera uburyo yahuje izina ry’umuryango wegereye ubwami n’ibirego bikomeye by’ihohotera rishingiye ku gitsina.

Nubwo Marius Borg Høiby adafite inshingano z’ubwami kandi atari mu murongo w’abazungura ingoma, ubucuti afitanye n’umuryango w’ibwami bwatumye uru rubanza ruba kimwe mu byakurikiwe cyane muri iki gihugu mu mwaka wa 2026.

Kugeza ubu, hategerejwe kumenya niba azajuririra icyemezo cy’urukiko cyangwa niba azatangira kurangiza igihano yahawe.