"Intore mu Biruhuko", ni gahunda y'igihugu igamije gufasha abana kwiga no gusobanukirwa byinshi mu biruhuko. Ku rwego rw'Akarere ka Gasabo, iyi gahunda yatangijwe ku mugaragaro kuri uyu wa Gatanu tariki ya 24 Nyakanga, ikazasozwa ku wa 28 Kanama 2026. Izajya ibera kuri buri Kagari ko mu Karere ka Gasabo.
Iyi gahunda ya "Intore mu Biruhuko" yatangijwe n'Umuyobozi Nshingwabikorwa w'Akarere wungirije, Mudaheranwa Regis, wasabye urubyiruko kuzajya bitabira iyi gahunda kuko bazigiramo byinshi bibafitiye akamaro. Ni igikorwa cyabereye mu Murenge wa Kinyinya, mu Kagari ka Kagugu.
Akarere ka Gasabo ku bufatanye n'Itorero Noble Family Church rifite icyiciro muri aka Karere, bahaye abakobwa 2,000 ibikoresho by’isuku birimo udutambaro tw’isuku twifashishwa mu gihe cy’imihango, impapuro z’isuku, isabune, amavuta yo kwisiga, umuti wo koza amenyo ndetse n’uburoso bwo koza amenyo.
Ibi bikoresho byose hamwe bingana na 6,000, bizashyikiriza abana ba bakobwa bo mu mirenge 15 igize Akarere ka Gasabo, aho uyu munsi bahereye ku batuye mu murenge wa Kinyinya.
Abateguye iki gikorwa bavuga ko kigamije gufasha abana b’abakobwa gukomeza kwita ku isuku yabo, bityo bakabasha gukomeza amasomo yabo no kwirinda ibibazo bishobora guterwa no kubura ibikoresho by’isuku.
Umushumba Mukuru wa Noble Family Church akaba n'Umuyobozi Mukuru wa Women Foundation Ministries imaze imyaka 20, Apostle Mignonne Kabera, ni we washyikirije aba bakobwa ibikoresho by’isuku anavuga ko bizera ko kubaka umuryango n’igihugu bitangirira ku kwita ku mwana.
Ati: ”Nk’Itorero Noble Family Church, twizera ko kubaka umuryango n’igihugu bitangirira ku kwita ku mwana, ni yo mpamvu twiyemeje kugira uruhare mu gufasha abana b'abakobwa kugira ubuzima bwiza, kubigisha isuku no kubasobanurira akamaro ko kwiyitaho. Turifuza ko nta mwana w’umukobwa wakongera guhura n’ibibazo biterwa no kubura ibikoresho by’isuku cyangwa ngo ashukishwe ibyo akeneye.”
Uyu Mushumba akomeza
uvuga ko buri mwana w’umukobwa akwiriye kugira icyubahiro, ubuzima bwiza ndetse
n’amahirwe angana n’ay'abandi yo gukura neza no kugera ku nzozi ze. Ati: "Buri mwana w’umukobwa akwiriye kugira icyubahiro, ubuzima bwiza n’amahirwe angana n’ay’abandi, agakura neza kandi akagera ku nzozi ze."
Apostle Mignonne Kabera yashimiye cyane Akarere ka Gasabo ndetse n'Ubuyobozi bw'Igihugu. Yagize ati: "Turashimira ubuyobozi bw’Akarere ka Gasabo ku bufatanye bwiza no gukomeza gushyigikira ibikorwa byiza byo gushyigikira abaturage. Turashimira ubuyobozi bw’Igihugu cyacu kuko ari bwo budushyigikira bukadufasha."
Akarere ka Gasabo nako kashimiye Noble Family Church, dore ko atari ubwa mbere bagiranye ubufatanye mu gufasha abatishoboje kuko mu mwaka washyize bakiriye Miliyoni 16 Frw bahawe n'iri Torero, hakaba hateganyijwe n’izindi Miliyoni 10 Frw ku itariki ya 11 Kanama 2026 zo gufasha imiryango itishoboye.
Ubufatanye hagati y’Akarere ka Gasabo, Noble Family Church na Women Foundation Ministries bumaze imyaka igera kuri 20, bugaragaza uruhare rw’inzego za Leta n’iz’abafatanyabikorwa mu guteza imbere imibereho myiza y’abana, by’umwihariko abakobwa, binyuze mu kubafasha kubona ibikoresho by’ibanze bibafasha kubaho neza no kugira ubuzima buzira umuze.
Umuyobozi Nshingwabikorwa w'Akarere wungirije, Mudaheranwa Regis, yashimye uruhare rw'amadini mu kubaka igihugu, ati: “Ubufatanye bw’Akarere n’amadini n’amatorero bugira uruhare rukomeye mu guhangana n’ibibazo byugarije umuryango birimo ubusinzi n’ubusambanyi. Bufasha kubaka abaturage bafite ubuzima bwiza n’indangagaciro nziza, cyane ko abantu benshi bagendera ku nyigisho zishingiye ku myemerere.
Apostle Mignonne yashimiye Akarere ka Gasabo n’abafatanya bikorwa babo ku bufanye bwiza anaboneraho kwibutsa abari bitabiriye uyu muhango kwimakaza umuco wo kugira isuku no kwita ku mwana, kumurinda no kumwubakira ejo hazaza heza cyane ko kwita ku mwana umwe bingana no kubaka umuryango ndetse n’igihugu muri rusange.
Yanatanze impamba y’ijambo ry’Imana riboneka muri Yesaya 1:19 havuga ngo "Nimwemera mukumvira muzarya ibyiza byo mu gihugu".
Noble Family Church yakoze iki gikorwa cy'ubugiraneza mu rwego rwo gukomeza intego yabo yo gukorera no guteza imbere imibereho myiza y'abaturage. Yavuze ko impinduka nyayo itagarukira ku butumwa itangira mu biterane cyangwa mu biganiro gusa, ahubwo "ni indangagaciro zituranga kandi dushyira mu bikorwa buri munsi."
Ubwo yaganiraga n'abanyamakuru, Apostle Mignonne yatumiye Abanyarwanda bose by'umwihariko abakobwa n'abagore kuzitabira igiterane ngarukamwaka cya All Women Together 2026 kizabera muri BK Arena tariki ya 11-15 Kanama 2026.
Mu bazagabura ijambo ry'Imana muri iki giterane kibaze kuba ubukombe mu Rwanda na Afrika, harimo bamwe mu bavugabutumwa bazwi ku rwego mpuzamahanga barimo: Dr. Bill Winston (USA), Pastor Matthew Ashimolowo (u Bwongereza);
Dr. Cindy Trimm (USA), Bishop Funke Felix Adejumo (Nigeria), Pastor Jessica Kayanja (Uganda), Rev. Julian Kyula (Kenya), Pastors Kingsley & Mildred Okonkwo (Nigeria), na Dr. Patience Melengana (Afurika y'Epfo).
Hazabaho umwanya wo kuramya no guhimbaza Imana mu ndirimbo zizayoborwa na Precious Stone Worship Team, itsinda ry'abaramyi rya Noble Family Church na Women Foundation Ministries, ndetse n'abaramyi bazwi ku rwego mpuzamahanga barimo: Dr. Sarah K (Kenya), Ntokozo Mbambo na Nqubeko Mbatha (Afurika y'Epfo) na Chevelle Franklyn (Jamaica).
Iki giterane ntabwo kizaba kigizwe gusa n'amateraniro yo gusenga, ahubwo kizaba kirimo gahunda zitandukanye zirimo"Evening Crusades", "Ni Jye Wa Mugore", "Men of Issachar", "Women & Girls Brunch", "My Identity Sessions", "Ministers & Workers Sessions", ndetse n'ibirori byihariye bya "Extended Ni Jye Wa Mugore Celebration".
Mu gutangiza gahunda yiswe "Intore mu Biruhuko", Noble Family Church n'Akarere ka Gasabo batanze ubufasha ku bana b'abakobwa 2,000 batishoboye
Noble Family Church yafatanyije n'Akarere ka Gasabo gufasha abana b’abakobwa 2,000 kubona ibikoresho by’isuku
"Turifuza ko nta mwana w’umukobwa wakongera guhura n’ibibazo biterwa no kubura ibikoresho by’isuku cyangwa ngo ashukishwe ibyo akeneye.” Apostle Mignonne Kabera
Noble Family Church batanze ubufasha mbere yo gutangira igiterane "All Women Together"
Abakristo ba Noble Family Church ubwo bahagurukiraga ku Kimihurura berekeza i Kagugu ahabereye iki gikorwa cy'ubugiraneza
Noble Family Church iri kwitegura igiterane gikomeye "All Women Together 2026" kibera muri BK Arena