Nize kuba umukinnyi ukomeye - Amalon wateguje Album nshya (VIDEO

Uyu muhanzi yabitangaje nyuma yo gutaramira mu Karere ka Karongi, mu gitaramo cya MTN Iwacu Muzika Festival cyabereye ku kibuga cya Rubengera, aho yahuriye ku rubyiniro n’abahanzi batandukanye ndetse na Bruce Melodie watumiwe nk’umuhanzi w’umushyitsi.

Amalon ni we wabimburiye abandi bahanzi ku rubyiniro, ariko kuva ku ndirimbo ya mbere kugeza ku ya nyuma, yagaragaje ko yari yiteguye guha ibyishimo abakunzi b’umuziki bari bateraniye i Karongi.

Yafunguye igitaramo aririmba indirimbo zirimo 'Impunzi', 'Karibu Nyumbani', 'Impanga', 'Byakubaho', 'Derila' na 'Ni Imana', mbere yo kugisoza n’indirimbo 'Nyirabasare' yahinduye isura y’iki gitaramo.

Ubwo yatangiraga kuririmba iyi ndirimbo, imbaga yari yuzuye ku kibuga cya Rubengera yahise ihaguruka, bamwe batangira kuyibyina mu buryo bwihariye, abandi bayiririmbana na we ijambo ku rindi. Byabaye nk’aho igitaramo cyinjiye mu kindi cyiciro, kuko buri wese yashakaga kugaragaza uko azi kubyina iyi ndirimbo.

Mu minota ibiri gusa yari amaze ku rubyiniro, Amalon yahise akuramo ikote yari yambaye, asigarana isengeri y’umweru, ibintu byarushijeho kuzamura amarangamutima y’abari bitabiriye iki gitaramo.

Nyuma yo gusoza indirimbo 'Impunzi', yashimiye abafana uburyo bamwakiriye, avuga ko atari yiteze urwego rw’imbaraga n’urukundo bamugaragarije. Yagize ati: "Ntabwo nari niteze ko aya masaha mwaba mwakubise gutya."

Nubwo yamaze iminota 25 gusa ku rubyiniro, yavuyeho asize benshi bagikomeza kubyina no kuririmba 'Nyirabasare', bigaragaza ko yari yanyuze imitima y’abari aho.

Album 'MVP' igiye kujya hanze

Nyuma y’igitaramo, Amalon yatangaje ko yamaze kurangiza Album ye nshya yise 'MVP', iriho indirimbo 12, ndetse ko agiye gutangira kuyisohora buhoro buhoro, ubwo azaba asoje ibitaramo bya MTN Iwacu Muzika Festival.

Yavuze ko indirimbo 'Ni Imana' ari yo yabaye iya mbere isohotse kuri iyi Album, ndetse ko kugeza ubu amaze gushyira hanze indirimbo enye ziyigize.

Yagize ati: "Buriya indirimbo 'Ni Imana' nayisohoye ari yo ndirimbo ya mbere kuri Album yanjye. Mfite Album iriho indirimbo 12, ubu ngeze ku ndirimbo ya kane. Nidusoza ibi bitaramo, ndahita nkomeza gusohora izisigaye. Album yitwa 'MVP'. Yararangiye, ubu ngiye gutangira kuyisohora yose."

Uyu muhanzi yavuze ko izina 'MVP' (Most Valuable Player) rifite ishingiro rikomeye mu buzima bwe bw’umuziki, kuko rishingiye ku rugendo rwamuranze rwuzuyemo ibihe byiza n’ibigoye.

Ati "Nagize urugendo rurimo kuzamuka no kumanuka. Ariko kuba nkiri hano, ni byo byatumye iyi Album nyita 'MVP' cyangwa se umukinnyi ukomeye."

Aya magambo agaragaza ko Amalon atarebye gusa ku ntsinzi yagize, ahubwo yanashingiye ku mbogamizi yanyuzemo zamufashije gukomera no gukomeza kwizera inzozi ze.

Mu gihe abakunzi be bakomeje gutegereza kumva ibihangano bishya, Amalon agaragaza ko yinjira mu kindi cyiciro cy’umuziki we, aho ashaka kwereka abantu uruhande rushya rw’ubuhanzi bwe binyuze muri Album 'MVP', avuga ko izaba ishingiye ku nkuru y’urugendo rwe, kwihangana no kongera kwiyubaka.