Ku wa Kabiri tariki ya 29 Nzeri 2026 saa Kumi
n'Ebyiri z'umugoroba kuri Estadio Nacional Tubaroes Azuis, ni bwo Cape Verde yakiriye Amavubi mu mukino wo ku munsi wa Kabiri wo gushaka itike y’igikombe
cya Afurika cya 2027 kizabera muri Kenya, Uganda na Tanzania.
Muri uyu mukino wo mu itsinda K, Amavubi yatsinze Cape
Verde ibitego 2-1 ahita ayobora iri tsinda n’amanota 6 mbere y’uko Mali ijya mu
kibuga na Liberia. Ni ibitego bya Niyomugabo Claude na Iradukunda Elia Tatou mu
gihe kimwe cya Cape Verde cyo cyatsinzwe na Gilson Tavares.
Nyuma y’uyu mukino, Umutoni Nadia usanzwe ari umukunzi
wa Niyomugabo Claude abinyujije kuri Instagram yahise yerekana ko yari yabanje
gusengera umukunzi we mbere y’umukino.
Mu butumwa aba bombi bagiranye kuri WhatsApp baganira, Nadia yabwiye Claude ati: ”Uyu munsi nkushyize mu biganza by’Imana
ikurinde, witware neza kurusha ubushize kandi utsinde”.
Amavubi yatsinze Cape Verde ibitego 2-1 nyuma y’uko
yaherukaga gutsinda Liberia ibitego 3-1 muri Stade Amahoro. Kugeza ubu ni yo
ayoboye itsinda K n’amanota 6.
Nadia ubwo yaganiraga na Claude mbere y'umukino, amubwira ko amushyize mu biganza by'Imana
Niyomugabo Claude na Umutoni Nadia basanzwe bakundana
Niyomugabo Claude yishimira igitego yatsinze agahesha Amavubi intsinzi ikomeye
Amavubi yatsinze Cape Verde ibitego 2-1