Niyomugabo yageze muri APR FC mu 2019, mu gihe iyi kipe yari komeje kubaka nyuma yaho yari imaze kubura igikombe na kimwe mu mwaka w'Imikino wari ushize. Yagiye akura mu nshingano kugeza ubwo yagizwe kapiteni, aba umwe mu bayobozi b’ikipe haba mu kibuga no hanze yacyo.
Mu myaka irindwi yamaze muri APR FC, Claude yegukanye ibikombe 13, birimo ibya BK Pro League inshuro zirindwi: 2019/2020, 2020/2021, 2021/2022, 2022/2023, 2023/2024, 2024/2025 na 2025/2026. Yatwaye kandi Super Cup 2025, ibikombe bibiri by’Amahoro muri 2024/2025 na 2025/2026, ndetse na Heroes Cup eshatu za 2020, 2021 na 2025.
Uretse ibikombe, Niyomugabo Claude azibukwa cyane ku kuba yarabaye Umuyobozi w'abakinnyi.Kuba kapiteni wa APR FC, ikipe ihora iharanira gutwara ibikombe, bisaba ubwitange, imyitwarire myiza no kuba urugero ku bandi bakinnyi.
Umwe mu bakunzi ba Ruhago ariko bakunda APR FC yagaragarije InyaRwanda ko Claude yabaye inkingi ikomeye mu musaruro ikipe yagize. Ati: "Niyomugabo Claude agiye asize ikimenyetso gikomeye muri APR FC. Ibikombe 13 mu myaka 7 ni ikigaragaza umukinnyi wagize uruhare rukomeye mu bihe byiza by’iyi kipe. Yari umuntu wumva inshingano kandi akagira uruhare mu kuyobora bagenzi be.”
Yakomeje avuga ko kuba umukinnyi watwaye ibikombe ari ikintu kimwe, ariko kuba kapiteni mu gihe ikipe iri ku rwego rwo hejuru bikaba ari indi nshingano ikomeye.
Kugeza ubu ntiharamenyekana ikipe Niyomugabo Claude yaba agiye kwerekezamo, gusa haravugwa amakipe arimo Azam FC yo muri Tanzania ndetse bivugwa ko ibiganiro byagenze neza.
Niyomugabo Claude atandukanye na APR FC yegukanyemo ibikombe 13