Niyo itangiye mbere muri Africa! Bimwe mu byo wamenya kuri shampiyona y'u Burundi igiye gutangira irimo amakipe 3 y'umuntu umwe

Kuri uyu wa Gatandatu tariki 14 Kanama 2021 ni bwo shampiyona y'icyiciro cya mbere mu Burundi itangira imikino ibanza. Iyi shampiyona ni imwe mu zigiye gutangira bwa mbere muri Afurika ntagihindutse. Covid-19 isa n'aho itigeze ihungabanya ibikorwa by'imikino mu Burundi kuko n'umwaka w'imikino 2020/21 wari wararangiye muri Gicurasi kandi nta mukino usubitswe cyangwa ngo uburizwemo.

Umwaka w'imikino 2021/22 ugiye gutangira ikipe ya Le Messager Ngozi ifite ibikombe 2 biheruka bya shampiyona, ubu igiye kurwana no gushaka igikombe cya 3 ubundi igakora amateka mu Burundi. Shampiyona y'Abarundi yenda kugira imikinire n'iyo mu Rwanda kuko nabo kuva mu 2019 ubu amakipe yagizwe 16 ahura hagati yayo akishakamo ikipe itwara shampiyona.

Bimwe mu bizaranga iyi Shampiyona

Iyi shampiyona izarangwa n'ihangana ry'amakipe agera kuri 4 arimo Le Messager Ngozi, Flambeau du centre, Bumamuru izanahagararira Uburundi muri CAF Confederation Cup ndetse na Athletico New Oil. Le Messager iheruka kwegukana igikombe cy'umwaka ushize bigoranye nyuma yo kurusha amanota 3 gusa Kayanza United.

Ikindi kizaranga iyi Shampiyona ni amakipe 3 azakina icyiciro cya mbere kandi yose akomoka ku muntu umwe. Ayo makipe ni Le Messager Ngozi, Flambeau du Centre zose zari zisanzwe mu cyiciro cya mbere, kongeraho Les Crocos de Rumonge nayo yazamutse uyu mwaka. Aya makipe yose ni ay'uwahoze ari umukuru w'igihugu cy' u Burundi Nyakwigendera Petero Nkurunziza washinze irerero rya Le Messager ari naryo ryagiye ribyara aya makipe yose. 

Les Crocos de Rumonge izamutse mu cyiciro cya mbere intara niyo iyiha amafaranga, Flambeau du Centre y'Igitega, nayo ifite umuyobozi bita Kazohera Venerand, hanyuma Le Messager Ngozi ikayoborwa na Manirakiza Marc ariko icyo wamenya ni uko izi kipe zose ziguma mu biganza by'umuryango wa Petero Nkurunziza.

Les Crocos de Rumonge yari imaze igihe kinini mu cyiciro cya kabiri nyuma bafata umwanzuro wo gukuraho Le Messager de Bujumbura, umwanya yari irimo bawusimbuza Les Crocos. Les Crocos de Rumonge nayo cyera yitwaga Le Messager de Rumonge nyuma bavuga ko ikipe zose zitakitwa Le Messager nayo izina ryaro rihinduka uko. Flambeau du Centre nayo ni nka Le Messager de Gitega, urumva ko izi kipe zose zihuriye Kuri Le Messager nk'uko twabivuze mbere ari ryo rerero ryashinze izi kipe zose.

Ikindi kizaranga iyi Shampiyona ni ikipe ya Les Crocos de Rumonge itazakirira ku kibuga cyayo kubera umuhanda ujyayo. Ikibuga cya Les Crocos ni kimwe mu bibuga byiza mu Burundi ndetse gifatwa nk'aho ari cyo kinini ariko kubera inzira ijyayo andi makipe yavuze ko atajya gukinirayo birangira ubuyobozi bw'umupira w'amaguru mu Burundi uyitegetse kujya yakirira imikino yayo kuri Peace Park Complexe stadium y'i Makamba. Top junior, Flambeau de L’est ndetse na Les Crocos niyo makipe yazamutse mu kiciro cya mbere.

Dore uko amakipe azahura ku munsi wa mbere wa shampiyona.

Ku wa Gatandatu Saa 15:00

Les Crocos izakira Aigle Noir

Rukinzo yakire Le Messager Ngozi Umukino uzaba ukomeye

Bumamuru ikine na Bujumbura City

Olympique star yakire Kayanza United Flambeau ikine na Dynamik.

Ku cyumweru Saa 15:00

Top Junior izakira Flambeau du Centre

Athletico yakire Royal Muramvya,

naho mu mukino ukomeye Musongati yakire Vital'O.